kamii na ki tire vahshii ne khaak udaane men
— Firaq Gorakhpuri
Kamee na kee tire vahshee ne khaak uDaane men
Junoon kaa naam uchhaltaa raha zamaane men
'firaaq' dauD ga.ee ruuh see zamaane men
Kahaan kaa dard bharaa thaa mire fasaane men
Junoon se bhuul huee dil pe choT khaane men
'firaaq' der abhee thee bahaar aane men
Wo koee rang hai jo uD na jaa.e ai gul-e-tar
Wo koee boo hai jo rusvaa na ho zamaane men
Wo aasteen hai koee jo lahoo na de nikle
Wo koee husn hai jhijhke jo rang laane men
Ye gul khile hain ki choTen jigar kee ubhree hain
Nihaan bahaar thee bulbul tire taraane men
Bayaan-e-sham.a hai haasil yahee hai jalne kaa
Fanaa kee kaifiyaten dekh jhilmilaane men
Kisee kee haalat-e-dil sun ke uTh ga.iin aankhen
Ki jaan paD ga.ee hasrat bhare fasaane men
Usee kee sharh hai ye uThte dard kaa aalam
Jo daastaan thee nihaan tere aankh uThaane men
Gharaz ki kaaT diye zindagee ke din ai dost
Wo teree yaad men hon yaa tujhe bhulaane men
Hameen hain gul hameen bulbul hameen havaa-e-chaman
'firaaq' khvaab ye dekhaa hai qaid-khaane men