kisi kaa yuun to huaa kaun umr bhar phir bhi

Kisee kaa yuun to huaa kaun umr bhar phir bhee Ye husn o ishq to dhokaa hai sab magar phir bhee Hazaar baar zamaana idhar se guzraa hai Na.ee na.ee see hai Kuch teree rahguzar phir bhee Kahoon ye kaise idhar dekh yaa na dekh udhar Ki dard dard hai phir bhee nazar nazar phir bhee Khushaa ishaara-e-paiham zahe sukoot-e-nazar Daraaz ho ke fasaana hai mukhtasar phir bhee Jhapak rahi hain zamaan o makaan kee bhee aankhen Magar hai qaafila aamaada-e-safar phir bhee Shab-e-firaaq se aage hai aaj meree nazar Ki kaT hee jaa.egee ye shaam-e-be-sahar phir bhee Kaheen yahee to nahin kaashif-e-hayaat-o-mamaat Ye husn o ishq ba-zaahir hain be-khabar phir bhee PalaT rahe hain ghareeb-ul-vatan palaTnaa thaa Wo koocha roo-kash-e-jannat ho ghar hai ghar phir bhee LuTaa huaa chaman-e-ishq hai nigaahon ko Dikhaa gaya vahee kya kya gul o samar phir bhee Kharaab ho ke bhee sochaa kiye tire mahjoor Yahee ki teree nazar hai tiree nazar phir bhee Ho be-niyaaz-e-asar bhee kabhi tiree miTTee Wo keemiyaa hee sahee rah ga.ee kasar phir bhee LipaT gaya tiraa deevaana garche manzil se UDee uDee see hai ye khaak-e-rahguzar phir bhee Tiree nigaah se bachne men umr guzree hai Utar gaya rag-e-jaan men ye neshtar phir bhee Gham-e-firaaq ke kushton kaa hashr kya hogaa Ye shaam-e-hijr to ho jaa.egee sahar phir bhee Fanaa bhee ho ke giraan-baaree-e-hayaat na poochh UThaa.e uTh nahin saktaa ye dard-e-sar phir bhee Sitam ke rang hain har iltifaat-e-pinhaan men Karam-numaa hain tire jaur sar-ba-sar phir bhee Khataa-muaaf tiraa afv bhee hai misl-e-sazaa Tiree sazaa men hai ik shaan-e-dar-guzar phir bhee Agarche be-khudee-e-ishq ko zamaana huaa 'firaaq' kartee rahi kaam wo nazar phir bhee