koi paigaam e mohabbat lab e ejaaz to de
— Firaq Gorakhpuri
Koi paighaam-e-mohabbat lab-e-ejaaz to de
Maut kee aankh bhee khul jaa.egee awaaz to de
Maqsad-e-ishq ham-aahangee-e-juzv-o-kul hai
Dard hee dard sahee dil boo-e-dam-saaz to de
Chashm-e-makhmoor ke unvaan-e-nazar Kuch to khulen
Dil-e-ranjoor dhaDakne kaa Kuch andaaz to de
Ik zaraa ho nasha-e-husn men andaaz-e-khumaar
Ik jhalak 'ishq ke anjaam kee aaghaaz to de
Jo chhupaa.e na chhupe aur bataa.e na bane
Dil-e-aashiq ko in aankhon se koi raaz to de
Muntazir itnee kabhi thee na fazaa-e-aafaaq
ChheDne hee ko hoon pur-dard ghazal saaz to de
Ham aseeraan-e-qafas aag lagaa sakte hain
Fursat-e-naghma kabhi hasrat-e-parvaaz to de
'ishq ik baar mashiyyat ko badal saktaa hai
Indiya apna magar Kuch nigah-e-naaz to de
Qurb o deedaar to maa'loom kisee kaa phir bhee
Kuch pata saa falak-e-tafraqa-pardaaz to de
Manzilen gard kee maanind uDee jaatee hain
Ablaq-e-dahr Kuch andaaz-e-tag-o-taaz to de
Kaan se ham to 'firaaq' aankh kaa lete hain kaam
Aaj chhup kar koi awaaz par awaaz to de