mujh ko maaraa hai har ik dard o davaa se pahle

Mujh ko maaraa hai har ik dard o davaa se pahle Dee sazaa ishq ne har jurm-o-khataa se pahle Aatish-e-ishq bhaDaktee hai havaa se pahle HonT julte hain mohabbat men duaa se pahle Fitne barpaa hue har ghuncha-e-sar-basta se Khul gaya raaz-e-chaman chaak-e-qabaa se pahle Chaal hai baada-e-hastee kaa chhalaktaa huaa jaam Ham kahaan the tire naqsh-e-kaf-e-paa se pahle Ab kamee kya hai tire be-sar-o-saamaanon ko Kuch na thaa teree qasam tark-e-wafa se pahle Ishq-e-bebaak ko da.ave the bahut khalvat men Kho diyaa saaraa bharam sharm-o-hayaa se pahle Khud-bakhud chaak hue pairahan-e-laala-o-gul Chal ga.ee kaun havaa baad-e-sabaa se pahle Ham-safar raah-e-adam men na ho taaron-bharee raat Ham pahunch jaa.enge is aabla-paa se pahle Parda-e-sharm men sad-barq-e-tabassum ke nisaar Hosh jaate rahe nairang-e-hayaa se pahle Maut ke naam se Darte the ham ai shauq-e-hayaat Too ne to maar hee Daalaa thaa qazaa se pahle Be-takalluf bhee tiraa husn-e-khud-aaraa thaa kabhee Ik adaa aur bhee thee husn-e-adaa se pahle Ghaflaten hastee-e-faanee kee bataa dengee tujhe Jo miraa haal thaa ehsaas-e-fanaa se pahle Ham unhen paa ke 'firaaq' aur bhee Kuch kho.e ga.e Ye takalluf to na the ahd-e-wafa se pahle