narm fazaa ki karvaten dil ko dukhaa ke rah gaiin

Narm fazaa kee karvaTen dil ko dukhaa ke rah ga.iin ThanDee havaa.en bhee tiree yaad dilaa ke rah ga.iin Shaam bhee thee dhuaan dhuaan husn bhee thaa udaas udaas Dil ko ka.ee kahaaniyaan yaad see aa ke rah ga.iin Mujh ko kharaab kar ga.iin neem-nigaahiyaan tiree Mujh se hayaat o maut bhee aankhen churaa ke rah ga.iin Husn-e-nazar-fareb men kis ko kalaam thaa magar Teree adaa.en aaj to dil men samaa ke rah ga.iin Tab kaheen Kuch pata chalaa sidq-o-khuloos-e-husn kaa Jab wo nigaahen ishq se baaten banaa ke rah ga.iin Tere khiraam-e-naaz se aaj vahaan chaman khile Faslen bahaar kee jahaan khaak uDaa ke rah ga.iin Poochh na un nigaahon kee turfa karishma-saaziyaan Fitne sulaa ke rah ga.iin fitne jagaa ke rah ga.iin Taaron kee aankh bhee bhar aa.ee meree sadaa-e-dard par Un kee nigaahen bhee tiraa naam bataa ke rah ga.iin Uf ye zameen kee gardishen aah ye gham kee Thokaren Ye bhee to bakht-e-khufta ke shaane hilaa ke rah ga.iin Aur to ahl-e-dard kaun sambhaaltaa bhalaa Haan teree shaadmaaniyaan un ko rulaa ke rah ga.iin Yaad Kuch aa.iin is tarah bhoolee huee kahaaniyaan Kho.e hue dilon men aaj dard uThaa ke rah ga.iin Saaz-e-nashaat-e-zindagee aaj laraz laraz uThaa Kis kee nigaahen ishq kaa dard sunaa ke rah ga.iin Tum nahin aa.e aur raat rah ga.ee raah dekhtee Taaron kee mahfilen bhee aaj aankhen bichhaa ke rah ga.iin Jhuum ke phir chaleen havaa.en vajd men aa.iin phir fazaa.en Phir tiree yaad kee ghaTaa.en seenon pe chhaa ke rah ga.iin Qalb o nigaah kee ye iid uf ye ma.aal-e-qurb-o-deed Charkh kee gardishen tujhe mujh se chhupaa ke rah ga.iin Phir hain vahee udaasiyaan phir vahee suunee kaa.enaat Ahl-e-tarab kee mahfilen rang jamaa ke rah ga.iin Kaun sukoon de sakaa gham-zadagaan-e-ishq ko Bheegtee raaten bhee 'firaaq' aag lagaa ke rah ga.iin