nigaah e naaz ne parde uthaae hain kya kya

Nigaah-e-naaz ne parde uThaa.e hain kya kya Hijaab ahl-e-mohabbat ko aa.e hain kya kya Jahaan men thee bas ik afvaah tere jalvon kee Charaagh-e-dair-o-haram jhilmilaa.e hain kya kya Do-chaar barq-e-tajallee se rehne vaalon ne Fareb narm-nigaahee ke khaa.e hain kya kya Dilon pe karte hue aaj aatee jaatee choT Tiree nigaah ne pahloo bachaa.e hain kya kya Nisaar nargis-e-mai-goon ki aaj paimaane Labon tak aa.e hue thartharaa.e hain kya kya Wo ik zaraa see jhalak barq-e-kam-nigaahee kee Jigar ke zakhm-e-nihaan muskuraa.e hain kya kya Charaagh-e-toor jale aa.ina-dar-aa.eena Hijaab barq-e-adaa ne uThaa.e hain kya kya Ba-qadr-e-zauq-e-nazar deed-e-husn kya ho magar Nigaah-e-shauq men jalve samaa.e hain kya kya Kaheen charaagh kaheen gul kaheen dil-e-barbaad Khiraam-e-naaz ne fitne uThaa.e hain kya kya Taghaaful aur baDhaa us ghazaal-e-ra.anaa kaa Fusoon-e-gham ne bhee jaadoo jagaa.e hain kya kya Hazaar fitna-e-bedaar khvaab-e-rangeen men Chaman men ghuncha-e-gul-rang laa.e hain kya kya Tire khuloos-e-nihaan kaa to aah kya kahnaa Sulook uchaTTe bhee dil men samaa.e hain kya kya Nazar bachaa ke tire ishva-haa-e-pinhaan ne Dilon men dard-e-mohabbat uThaa.e hain kya kya Payaam-e-husn payaam-e-junoon payaam-e-fanaa Tiree nigah ne fasaane sunaa.e hain kya kya Tamaam husn ke jalve tamaam mahroomee Bharam nigaah ne apne ganvaa.e hain kya kya 'firaaq' raah-e-wafa men subuk-ravee teree BaDe-baDon ke qadam Dagmagaa.e hain kya kya