parchhaaiyaan 1

1 Ye shaam ik aa.eena-e-neel-goon ye nam ye mahak Ye manzaron kee jhalak khet baagh Dariya gaanv Vo kuch sulagte hue kuch sulagne vaale alaav Siyaahiyon kaa dabe-paanv aasmaan se nuzool LaTon ko khol de jis tarah shaam kee devee Puraane waqt ke bargad kee ye udaas jaTaa.en Qareeb o duur ye go dhuul kee ubhartee ghaTaa.en Ye kaa.enaat kaa Thahraao ye athaah sukoot Ye neem-teerah fazaa roz-e-garm kaa taaboot Dhuaan dhuaan see zameen hai ghulaa ghulaa saa falak 2 Ye chaandnee ye havaa.en ye shaakh-e-gul kee lachak Ye daur-e-baada ye saaz-e-khamosh fitrat ke Sunaa.ee dene lagee jagmagaate seenon men Dilon ke naazuk o shaffaaf aabgeenon men Tire khayaal kee paDtee huee kiran kee khanak 3 Ye raat chhantee havaaon kee sondhee sondhee mahak Ye khet kartee huee chaandnee kee narm damak Sugandh raat kee raanee kee jab machaltee hai Fazaa men rooh-e-tarab karvaTen badaltee hai Ye ruup sar se qadam tak haseen jaise gunaah Ye aarizon kee damak ye fusoon-e-chashm-e-siyaah Ye dhaj na de jo ajantaa kee san.aton ko panaah Ye siina paD hee ga.ee dev lok kee bhee nigaah Ye sar-zameen se aakaash kee parastish-gaah Utaarte hain tiree aartee sitaara o maah Sajal badan kee bayaan kis tarah ho kaifiyyat Sarasvatee ke bajaate hue sitaar kee gat Jamaal-e-yaar tire gulsitaan kee rah rah ke Jabeen-e-naaz tiree kahkashaan kee rah rah ke Dilon men aa.eena-dar-aa.eena suhaanee jhalak 4 Ye chhab ye ruup ye joban ye saj ye dhaj ye lahak Chamakte taaron kee kirnon kee narm narm phuvaar Ye rasmasaate badan kaa uThaan aur ye ubhaar Fazaa ke aa.eena men jaise lahlahaa.e bahaar Ye be-qaraar ye be-ikhtiyaar josh-e-numood Ki jaise nuur kaa favvaara ho shafaq-aalood Ye jalve paikar-e-shab-taab ke ye bazm-e-shohood Ye mastiyaan ki mai-e-saaf-o-durd sab be-bood Khajil ho laal-e-yaman uzv uzv kee wo Dalak 5 Bas ik sitaara-e-shingaraf kee jabeen pe jhamak Vo chaal jis se labaalab gulaabiyaan chhalken Sakoon-numaa kham-e-abru ye adh-khuleen palken Har ik nigaah se aiman kee bijliyaan lapken Ye aankh jis men ka.ee aasmaan dikhaa.ee paDen UDaa den hosh wo kaanon kee saada saada laven GhaTaa.en vajd men aa.en ye gesuon kee laTak 6 Ye kaif-o-rang-e-nazaara ye bijliyon kee lapak Ki jaise krishn se raadhaa kee aankh ishaare kare Vo shokh ishaare ki rabbaaniyat bhee jaa.e jhapak Jamaal sar se qadam tak tamaam sho.ala hai Sukoon jumbish o ram tak tamaam sho.ala hai Magar wo sho.ala ki aankhon men Daal de ThanDak 7 Ye raat niind men Duube hue se hain deepak Fazaa men bujh ga.e uD uD ke jugnuon ke sharaar Kuchh aur taaron kee aankhon kaa baDh chalaa hai khumaar Fasurda chhiTkee huee chaandnee kaa dhundlaa ghubaar Ye bheegee bheegee oodaahaT ye bheegaa bheegaa nuur Ki jaise chashma-e-zulmaat men jale kaafoor Ye Dhaltee raat sitaaron ke qalb kaa ye gudaaz Khunuk fazaa men tiraa shabnamee tabassum-e-naaz Jhalak jamaal kee ta.abeer khvaab aa.eena-saaz Jahaan se jism ko dekhen tamaam naaz-o-niyaaz Jahaan nigaah Thahar jaa.e raaz-andar-raaz Sukoot-e-neem-shabee lahlahe badan kaa nikhaar Ki jaise niind kee vaadee men jaagtaa sansaar Hai bazm-e-maah ki parchhaa.iyon kee bastee hai Fazaa kee oT se wo khaamushee barastee hai Ki buund buund se paidaa ho gosh o dil men khanak 8 Kisee khayaal men hai gharq chaandnee kee chamak Havaa.en niind ke kheton se jaise aatee hon Hayaat o maut men sargoshiyaan see hotee hain KaroDon saal ke jaage sitaare nam-deeda Siyaah gesuon ke saanp neem-khvaabeeda Ye pichhlee raat ye rag rag men narm narm kasak 1 Ye sham ek aaina-e-nil-gun ye nam ye mahak Ye manzaron ki jhalak khet bagh dariya ganw Wo kuch sulagte hue kuch sulagne wale alaw Siyahiyon ka dabe-panw aasman se nuzul LaTon ko khol de jis tarah sham ki dewi Purane waqt ke bargad ki ye udas jaTaen Qarib o dur ye go dhul ki ubharti ghaTaen Ye kaenat ka Thahrao ye athah sukut Ye nim-tirah faza roz-e-garm ka tabut Dhuan dhuan si zamin hai ghula ghula sa falak 2 Ye chandni ye hawaen ye shaKH-e-gul ki lachak Ye daur-e-baada ye saz-e-KHamosh fitrat ke Sunai dene lagi jagmagate sinon mein Dilon ke nazuk o shaffaf aabginon mein Tere KHayal ki paDti hui kiran ki khanak 3 Ye raat chhanti hawaon ki sondhi sondhi mahak Ye khet karti hui chandni ki narm damak Sugandh raat ki rani ki jab machalti hai Faza mein ruh-e-tarab karwaTen badalti hai Ye rup sar se qadam tak hasin jaise gunah Ye aarizon ki damak ye fusun-e-chashm-e-siyah Ye dhaj na de jo ajanta ki sanaton ko panah Ye sina paD hi gai dew lok ki bhi nigah Ye sar-zamin se aakash ki parastish-gah Utarte hain teri aarti sitara o mah Sajal badan ki bayan kis tarah ho kaifiyyat Saraswati ke bajate hue sitar ki gat Jamal-e-yar tere gulsitan ki rah rah ke Jabin-e-naz teri kahkashan ki rah rah ke Dilon mein aaina-dar-aina suhani jhalak 4 Ye chhab ye rup ye joban ye saj ye dhaj ye lahak Chamakte taron ki kirnon ki narm narm phuwar Ye rasmasate badan ka uThan aur ye ubhaar Faza ke aaina mein jaise lahlahae bahaar Ye be-qarar ye be-iKHtiyar josh-e-numud Ki jaise nur ka fawwara ho shafaq-alud Ye jalwe paikar-e-shab-tab ke ye bazm-e-shohud Ye mastiyan ki mai-e-saf-o-durd sab be-bud KHajil ho lal-e-yaman uzw uzw ki wo Dalak 5 Bas ek sitara-e-shingaraf ki jabin pe jhamak Wo chaal jis se labaalab gulabiyan chhalken Sakun-numa KHam-e-abru ye adh-khulin palken Har ek nigah se aiman ki bijliyan lapken Ye aankh jis mein kai aasman dikhai paDen UDa den hosh wo kanon ki sada sada lawen GhaTaen wajd mein aaen ye gesuon ki laTak 6 Ye kaif-o-rang-e-nazara ye bijliyon ki lapak Ki jaise krishn se radha ki aankh ishaare kare Wo shoKH ishaare ki rabbaniyat bhi jae jhapak Jamal sar se qadam tak tamam shoala hai Sukun jumbish o ram tak tamam shoala hai Magar wo shoala ki aankhon mein Dal de ThanDak 7 Ye raat nind mein Dube hue se hain dipak Faza mein bujh gae uD uD ke jugnuon ke sharar Kuchh aur taron ki aankhon ka baDh chala hai KHumar Fasurda chhiTki hui chandni ka dhundla ghubar Ye bhigi bhigi udahaT ye bhiga bhiga nur Ki jaise chashma-e-zulmat mein jale kafur Ye Dhalti raat sitaron ke qalb ka ye gudaz KHunuk faza mein tera shabnami tabassum-e-naz Jhalak jamal ki tabir KHwab aaina-saz Jahan se jism ko dekhen tamam naz-o-niyaz Jahan nigah Thahar jae raaz-andar-raaz Sukut-e-nim-shabi lahlahe badan ka nikhaar Ki jaise nind ki wadi mein jagta sansar Hai bazm-e-mah ki parchhaiyon ki basti hai Faza ki oT se wo KHamushi barasti hai Ki bund bund se paida ho gosh o dil mein khanak 8 Kisi KHayal mein hai gharq chandni ki chamak Hawaen nind ke kheton se jaise aati hon Hayat o maut mein sargoshiyan si hoti hain KaroDon sal ke jage sitare nam-dida Siyah gesuon ke sanp nim-KHwabida Ye pichhli raat ye rag rag mein narm narm kasak