raat bhi niind bhi kahaanii bhi

Raat bhee niind bhee kahaanee bhee Haa.e kya chiiz hai javaanee bhee Ek paighaam-e-zindagaanee bhee Aashiqee marg-e-naa-gahaanee bhee Is adaa kaa tiree javaab nahin Mehrbaanee bhee sargiraanee bhee Dil ko apne bhee gham the Dunya men Kuch balaa.en thiin aasmaanee bhee Mansab-e-dil khushee luTaanaa hai Gham-e-pinhaan kee paasbaanee bhee Dil ko sho.alon se kartee hai sairaab Zindagee aag bhee hai paanee bhee Shaad-kaamon ko ye nahin taufeeq Dil-e-gham-gheen kee shaadmaanee bhee Laakh husn-e-yaqeen se baDh kar hai Un nigaahon kee bad-gumaanee bhee Tangnaa-e-dil-e-malool men hai Bahr-e-hastee kee be-karaanee bhee Ishq-e-naakaam kee hai parchhaa.een Shaadmaanee bhee kaamraanee bhee Dekh dil ke nigaar-khaane men Zakhm-e-pinhaan kee hai nishaanee bhee Khalq kya kya mujhe nahin kahtee Kuch sunoon main tiree zabaanee bhee Aa.e taareekh-e-ishq men sau baar Maut ke daur-e-darmiyaanee bhee Apnee ma.asoomiyat ke parde men Ho ga.ee wo nazar siyaanee bhee Din ko sooraj-mukhee hai wo nau-gul Raat ko hai wo raat-raanee bhee Dil-e-bad-naam tere baare men Log kahte hain ik kahaanee bhee Vaz.a karte koi na.ee Dunya Ki ye Dunya huee puraanee bhee Dil ko aadaab-e-bandagee bhee na aa.e Kar ga.e log hukmaraanee bhee Jaur-e-kam-kam kaa shukriya bas hai Aap kee itnee mehrbaanee bhee Dil men ik huuk bhee uThee ai dost Yaad aa.ee tiree javaanee bhee Sar se paa tak supurdagee kee adaa Ek andaaz-e-turkamaanee bhee Paas rahnaa kisee kaa raat kee raat Mehmaanee bhee mezbaanee bhee Ho na aks-e-jabeen-e-naaz ki hai Dil men ik noor-e-kahkashaanee bhee Zindagee ain deed-e-yaar 'firaaq' Zindagee hijr kee kahaanee bhee