ras men duubaa huaa lahraataa badan kya kahnaa

Ras men Duubaa huaa lahraataa badan kya kahnaa KarvaTen letee huee sub.h-e-chaman kya kahnaa Nigah-e-naaz men ye pichhle pahar rang-e-khumaar Niind men Duubee huee chandr-kiran kya kahnaa Baagh-e-jannat pe ghaTaa jaise baras ke khul jaa.e Ye suhaanee tiree khushbu-e-badan kya kahnaa Thahree Thahree see nigaahon men ye vahshat kee kiran Chaunke chaunke se ye aahoo-e-khutan kya kahnaa Ruup sangeet ne dhaaraa hai badan kaa ye rachaav Tujh pe lahloot hai be-saakhta-pan kya kahnaa Jaise lahraa.e koi sho.ala-kamar kee ye lachak Sar-ba-sar aatish-e-sayyaal badan kya kahnaa Jis tarah jalva-e-firdos havaaon se chhine Pairahan men tire rangeenee-e-tan kya kahnaa Jalva-o-parde kaa ye rang dam-e-nazzaara Jis tarah adh-khule ghoonghaT men dulhan kya kahnaa Dam-e-taqreer khil uThte hain gulistaan kya kya Yuun to ik ghuncha-e-nauras hai dahan kya kahnaa Dil ke aa.eene men is tarah utartee hai nigaah Jaise paanee men lachak jaa.e kiran kya kahnaa Lahlahaataa huaa ye qad ye lahaktaa joban Zulf so mahkee huee raaton kaa ban kya kahnaa Too mohabbat kaa sitaara to javaanee kaa suhaag Husn lau detaa hai laa'l-e-yaman kya kahnaa Teree awaaz saveraa tiree baaten taDkaa Aankhen khul jaatee hain ejaaz-e-sukhan kya kahnaa Zulf-e-shab-goon kee chamak paikar-e-seemeen kee damak Deep-maalaa hai sar-e-gang-o-jaman kya kahnaa Neelgoon shabnamee kapDon men badan kee ye jot Jaise chhantee ho sitaaron kee kiran kya kahnaa