sar men sauda bhi nahin dil men tamannaa bhi nahin

Sar men sauda bhee nahin dil men tamannaa bhee nahin Lekin is tark-e-mohabbat kaa bharosaa bhee nahin Dil kee gintee na yagaanon men na begaanon men Lekin us jalva-gah-e-naaz se uThtaa bhee nahin Mehrbaanee ko mohabbat nahin kahte ai dost Aah ab mujh se tiree ranjish-e-bejaa bhee nahin Ek muddat se tiree yaad bhee aa.ee na hamen Aur ham bhuul ga.e hon tujhe aisa bhee nahin Aaj ghaflat bhee un aankhon men hai pahle se sivaa Aaj hee khaatir-e-beemaar shakebaa bhee nahin Baat ye hai ki sukoon-e-dil-e-vahshee kaa maqaam Kunj-e-zindaan bhee nahin vus.at-e-sahraa bhee nahin Are sayyaad hameen gul hain hameen bulbul hain Too ne Kuch aah sunaa bhee nahin dekhaa bhee nahin Aah ye majma-e-ahbaab ye bazm-e-khaamosh Aaj mahfil men 'firaaq'-e-sukhan-aaraa bhee nahin Ye bhee sach hai ki mohabbat pe nahin main majboor Ye bhee sach hai ki tiraa husn Kuch aisa bhee nahin Yuun to hangaame uThaate nahin deevaana-e-ishq Magar ai dost Kuch aison kaa Thikaanaa bhee nahin Fitrat-e-husn to ma.aloom hai tujh ko hamdam Chaara hee kya hai ba-juz sabr so hota bhee nahin Munh se ham apne buraa to nahin kahte ki 'firaaq' Hai tiraa dost magar aadmee achchhaa bhee nahin