shaam e ayaadat

Ye kaun muskuraahaTon kaa kaarvaan liye hue Shabaab-e-sher-o-rang-o-noor kaa dhuaan liye hue Dhuaan ki barq-e-husn kaa mahaktaa sho.ala hai koi ChaTeelee zindagee kee shaadmaaniyaan liye hue Labon se pankhuDee gulaab kee hayaat maange hai Kanval see aankh sau nigaah-e-mehrbaan liye hue Qadam qadam pe de uThee hai lau zameen-e-rah-guzar Adaa adaa men be-shumaar bijliyaan liye hue Nikalte baiThte dinon kee aahaTen nigaah men Raseele honT fasl-e-gul kee daastaan liye hue Khutoot-e-rukh men jalva-gar wafa ke naqsh sar-ba-sar Dil-e-ghanee men kul hisaab-e-dostaan liye hue Vo muskuraatee aankhen jin men raqs kartee hai bahaar Shafaq kee gul kee bijliyon kee shokhiyaan liye hue Adaa-e-husn barq-paash shola-zan nazaara-soz Fazaa-e-husn uudee uudee bijliyaan liye hue Jagaane vaale naghma-e-sahar labon pe maujzan Nigaahen niind laane vaalee loriyaan liye hue Vo nargis-e-siyaah-e-neem-baaz, mai-kada-ba-dosh Hazaar mast raaton kee javaaniyaan liye hue Taghaaful-o-khumaar aur be-khudee kee oT men Nigaahen ik jahaan kee hoshiyaariyaan liye hue Haree-bharee ragon men wo chahaktaa boltaa lahoo Vo sochtaa huaa badan khud ik jahaan liye hue Za-farq taa-qadam tamaam chehra jism-e-naazneen Lateef jagmagaahaTon kaa kaarvaan liye hue Tabassumash takallume takallumash tarannume Nafas nafas men thartharaataa saaz-e-jaan liye hue Jabeen-e-noor jis pe paD rahi hai narm chhooT see Khud apnee jagmagaahTon kee kahkashaan liye hue ''sitaara-baar o mah-chakaan o khoor-fishaan'' jamaal-e-yaar Jahaan-e-noor kaarvaan-ba-kaarvaan liye hue Vo zulf-e-kham-ba-kham shameem-e-mast se dhuaan dhuaan Vo rukh chaman chaman bahaar-e-jaavedaan liye hue Ba-mastee-e-jamaal-e-kaa.enaat, khvaab-e-kaa.enaat Ba-gardish-e-nigaah daur-e-aasmaan liye hue Ye kaun aa gaya mire qareeb uzv uzv men Javaaniyaan, javaaniyon kee aandhiyaan liye hue Ye kaun aankh paD rahi hai mujh par itne pyaar se Vo bhoolee see wo yaad see kahaaniyaan liye hue Ye kis kee mahkee mahkee saansen taaza kar ga.iin dimaagh Shabon ke raaz noor-e-mah kee narmiyaan liye hue Ye kin nigaahon ne mire gale men baahen Daal diin Jahaan bhar ke dukh se dard se amaan liye hue Nigaah-e-yaar de ga.ee mujhe sukoon-e-be-karaan Vo be-kahee vafaaon kee gavaahiyaan liye hue Mujhe jagaa raha hai maut kee ghunoodgee se kaun Nigaahon men suhaag-raat kaa samaan liye hue Miree fasurda aur bujhee huee jabeen ko chhoo liyaa Ye kis nigaah kee kiran ne saaz-e-jaan liye hue Sute se chehre par hayaat rasmasaatee muskuraatee Na jaane kab ke aansuon kee daastaan liye hue Tabassum-e-sahar hai aspataal kee udaas shaam Ye kaun aa gaya nashaat-e-be-karaan liye hue Tire na aane tak agarche mehrbaan tha ik jahaan Main ro ke rah gaya hoon sau gham-e-nihaan liye hue Zameen muskuraa uThee ye shaam jagmagaa uThee Bahaar lahlhaa uThee shameem-e-jaan liye hue Fazaa-e-aspataal hai ki rang-o-boo kee karvaTen Tire jamaal-e-laala-goon kee daastaan liye hue 'firaaq' aaj pichhlee raat kyuun na mar rahoon ki ab Hayaat aisi shaamen hogee phir kahaan liye hue (2) Magar nahin kuch aur maslahat thee us ke aane men Jamaal-o-deed-e-yaar the nayaa jahaan liye hue Isee na.e jahaan men aadmee banenge aadmee Jabeen pe shaahkaar-e-dahr kaa nishaan liye hue Isee na.e jahaan men aadmee banenge devtaa Tahaaraton kaa farq-e-paak par nishaan liye hue Khudaa.ee aadmee kee hogee is na.e jahaan par Sitaaron ke hain dil ye pesh-goeeyan liye hue Sulagte dil sharar-fishaan o sho.ala-baar barq-paash Guzarte din hayaat-e-nau kee surkhiyaan liye hue Tamaam qaul aur qasam nigaah-e-naaz-e-yaar thee Tuloo-e-zindagee-e-nau kee daastaan liye hue Nayaa janam huaa miraa ki zindagee na.ee milee Jiyoongaa shaam-e-deed kee nishaaniyaan liye hue Na dekhaa aankh uThaa ke ahd-e-nau ke parda-daaron ne Guzar gaya zamaana yaad-e-raftagaan liye hue Ham inqilaabiyon ne ye jahaan bachaa liyaa magar Abhee hai ik jahaan wo bad-gumaaniyaan liye hue (3) Na.e zamaane men agar udaas khud ko paa.oongaa Ye shaam yaad kar ke apne gham ko bhuul jaa.oongaa Ayaadat-e-habeeb se wo aaj zindagee milee Khushee bhee chaunk chauk uThee gham kee aankh khul ga.ee Agarche doctor ne mujh ko maut se bachaa liyaa Par is ke ba.ad us nigaah ne mujhe jilaa liyaa Nigaah-e-yaar tujh se apnee manzilen main paa.oongaa Tujhe jo bhuul jaa.oongaa to raah bhuul jaa.oongaa (4) Qareeb-tar main ho chalaa hoon dukh kee kaa.enaat se Main ajnabee nahin raha hayaat se mamaat se Vo dukh sahe ki mujh pe khul gaya hai dard-e-kaa.enaat Hai apne aansuon se mujh pe aa.eena gham-e-hayaat Ye be-qusoor jaan-daar dard jhelte hue Ye khaak-o-khoon ke putle apnee jaan pe khelte hue Vo ziist kee karaah jis se be-qaraar hai fazaa Vo zindagee kee aah jis se kaanp uThtee hai fazaa Kafan hai aansuon kaa dukh kee maaree kaa.enaat par Hayaat kya inhen haqeeqaton se honaa be-khabar Jo aankh jaagtee rahi hai aadmee kee maut par Vo abr-e-rang-rang ko bhee dekhtee hai saada-tar Sikhaa gaya dukh miraa puraanee piir jaannaa Nigaah-e-yaar thee jahaan bhee aaj meree rahnumaa Yahee nahin ki mujh ko aaj zindagee na.ee milee Haqeeqat-e-hayaat mujh pe sau tarah se khul ga.ee Gavaah hai ye shaam aur nigaah-e-yaar hai gavaah Khayaal-e-maut ko main apne dil men ab na doongaa raah Jiyoongaa haan jiyoongaa ai nigaah-e-aashnaa-e-yaar Sadaa suhaag zindagee hai aur jahaan sadaa-bahaar (5) Abhee to kitne naa-shuneeda naghma-e-hayaat hain Abhee nihaan dilon se kitne raaz-e-kaa.enaat hain Abhee to zindagee ke naa-chasheeda ras hain saikDon Abhee to haath men ham ahl-e-gham ke jas hain saikDon Abhee wo le rahi hain meree shaa.eree men karvaTen Abhee chamakne vaalee hai chhupee huee haqeeqaten Abhee to bahr-o-bar pe so rahi hain meree wo sadaa.en SameT luun unhen to phir wo kaa.enaat ko jagaa.en Abhee to ruuh ban ke zarre zarre men samaa.oongaa Abhee to sub.h ban ke main ufuq pe thartharaa.oongaa Abhee to meree shaa.eree haqeeqaten looTaa.egee Abhee miree sadaa-e-dard ik jahaan pe chhaa.egee Abhee to aadmee aseer-e-daam hai ghulaam hai Abhee to zindagee sad-inqalaab kaa payaam hai Abhee tamaam zakhm o daagh hai tamaddun-e-jahaan Abhee rukh-e-bashar pe hain bahmiyat kee jhaa.iyaan Abhee mashiyyaton pe fat.h paa nahin sakaa bashar Abhee muqaddaron ko bas men laa nahin sakaa bashar Abhee to is dukhee jahaan men maut hee kaa daur hai Abhee to jis ko zindagee kahen wo chiiz aur hai Abhee to Khoon thoktee hai zindagee bahaar men Abhee to rone kee sadaa hai naghma-e-sitaar men Abhee to uDtee hain rukh-e-bahaar par havaa.iyaan Abhee to deedanee hain har chaman kee be-fazaa.iyaan Abhee fazaa-e-dahr legee karvaTon pe karvaTen Abhee to sotee hain havaaon kee wo sansanaahaTen Ki jis ko sunte hee hukoomaton ke rang-e-rukh uDen ChapeTen jin kee sarkashon kee gardanen maroD den Abhee to seena-e-bashar men sote hain wo zalzale Ki jin ke jaagte hee maut kaa bhee dil dahal uThe Abhee to batn-e-ghaib men hai is savaal kaa javaab Khudaa-e-khair-o-shar bhee laa nahin sakaa tha jis kee taab Abhee to god men hain devtaaon kee wo maah-o-saal Jo denge baDh ke barq-e-toor se hayaat ko jalaal Abhee rag-e-jahaan men zindagee machalne vaalee hai Abhee hayaat kee na.ee sharaab Dhalne vaalee hai Abhee chhuree sitam kee Doob kar uchhalne vaalee hai Abhee to hasrat ik jahaan kee nikalne vaalee hai Abhee ghan-garaj sunaa.ee degee inqalaab kee Abhee to gosh-bar-sadaa hai bazm aaftaab kee Abhee to poonjee-vaad ko jahaan se miTaanaa hai Abhee to saamraajon ko sazaa-e-maut paanaa hai Abhee to daant peestee hai maut shahryaaron kee Abhee to Khoon utar raha hai aa.ankhon men sitaaron kee Abhee to ishtiraakiyat ke jhanDe gaDne vaale hain Abhee to jaD se kisht-o-khoon ke nazm ukhaDne vaale hain Abhee kisaan-o-kaamgaar raaj hone vaalaa hai Abhee bahut jahaan men kaam-kaaj hone vaalaa hai Magar abhee to zindagee museebaton kaa naam hai Abhee to niind maut kee mire liye haraam hai Ye sab payaam ik nigaah men wo aankh de ga.ee Ba-yak-nazar kahaan kahaan mujhe wo aankh le ga.ee Ye kaun muskurahaTon ka karwan liye hue Shabab-e-sher-o-rang-o-nur ka dhuan liye hue Dhuan ki barq-e-husn ka mahakta shoala hai koi ChaTili zindagi ki shadmaniyan liye hue Labon se pankhuDi gulab ki hayat mange hai Kanwal si aankh sau nigah-e-mehrban liye hue Qadam qadam pe de uThi hai lau zamin-e-rah-guzar Ada ada mein be-shumar bijliyan liye hue Nikalte baiThte dinon ki aahaTen nigah mein Rasile honT fasl-e-gul ki dastan liye hue KHutut-e-ruKH mein jalwa-gar wafa ke naqsh sar-ba-sar Dil-e-ghani mein kul hisab-e-dostan liye hue Wo muskuraati aankhen jin mein raqs karti hai bahaar Shafaq ki gul ki bijliyon ki shoKHiyan liye hue Ada-e-husn barq-pash shola-zan nazara-soz Faza-e-husn udi udi bijliyan liye hue Jagane wale naghma-e-sahar labon pe maujzan Nigahen nind lane wali loriyan liye hue Wo nargis-e-siyah-e-nim-baz, mai-kada-ba-dosh Hazar mast raaton ki jawaniyan liye hue Taghaful-o-KHumar aur be-KHudi ki oT mein Nigahen ek jahan ki hoshiyariyan liye hue Hari-bhari ragon mein wo chahakta bolta lahu Wo sochta hua badan KHud ek jahan liye hue Za-farq ta-qadam tamam chehra jism-e-naznin Latif jagmagahaTon ka karwan liye hue Tabassumash takallume takallumash tarannume Nafas nafas mein thartharaata saz-e-jaan liye hue Jabin-e-nur jis pe paD rahi hai narm chhuT si KHud apni jagmagahTon ki kahkashan liye hue Sitara-bar o mah-chakan o KHur-fishan jamal-e-yar Jahan-e-nur karwan-ba-karwan liye hue Wo zulf-e-KHam-ba-KHam shamim-e-mast se dhuan dhuan Wo ruKH chaman chaman bahaar-e-jawedan liye hue Ba-masti-e-jamal-e-kaenat, KHwab-e-kaenat Ba-gardish-e-nigah daur-e-asman liye hue Ye kaun aa gaya mere qarib uzw uzw mein Jawaniyan, jawaniyon ki aandhiyan liye hue Ye kaun aankh paD rahi hai mujh par itne pyar se Wo bhuli si wo yaad si kahaniyan liye hue Ye kis ki mahki mahki sansen taza kar gain dimagh Shabon ke raaz nur-e-mah ki narmiyan liye hue Ye kin nigahon ne mere gale mein bahen Dal din Jahan bhar ke dukh se dard se aman liye hue Nigah-e-yar de gai mujhe sukun-e-be-karan Wo be-kahi wafaon ki gawahiyan liye hue Mujhe jaga raha hai maut ki ghunudgi se kaun Nigahon mein suhag-raat ka saman liye hue Meri fasurda aur bujhi hui jabin ko chhu liya Ye kis nigah ki kiran ne saz-e-jaan liye hue Sute se chehre par hayat rasmasati muskuraati Na jaane kab ke aansuon ki dastan liye hue Tabassum-e-sahar hai aspatal ki udas sham Ye kaun aa gaya nashat-e-be-karan liye hue Tere na aane tak agarche mehrban tha ek jahan Main ro ke rah gaya hun sau gham-e-nihan liye hue Zamin muskura uThi ye sham jagmaga uThi Bahaar lahlha uThi shamim-e-jaan liye hue Faza-e-aspatal hai ki rang-o-bu ki karwaTen Tere jamal-e-lala-gun ki dastan liye hue 'firaq' aaj pichhli raat kyun na mar rahun ki ab Hayat aisi shamen hogi phir kahan liye hue (2) Magar nahin kuch aur maslahat thi us ke aane mein Jamal-o-did-e-yar the naya jahan liye hue Isi nae jahan mein aadmi banenge aadmi Jabin pe shahkar-e-dahr ka nishan liye hue Isi nae jahan mein aadmi banenge dewta Tahaaraton ka farq-e-pak par nishan liye hue KHudai aadmi ki hogi is nae jahan par Sitaron ke hain dil ye pesh-goiyan liye hue Sulagte dil sharar-fishan o shoala-bar barq-pash Guzarte din hayat-e-nau ki surKHiyan liye hue Tamam qaul aur qasam nigah-e-naz-e-yar thi Tulu-e-zindagi-e-nau ki dastan liye hue Naya janam hua mera ki zindagi nai mili Jiyunga sham-e-did ki nishaniyan liye hue Na dekha aankh uTha ke ahd-e-nau ke parda-daron ne Guzar gaya zamana yaad-e-raftagan liye hue Hum inqilabiyon ne ye jahan bacha liya magar Abhi hai ek jahan wo bad-gumaniyan liye hue (3) Nae zamane mein agar udas KHud ko paunga Ye sham yaad kar ke apne gham ko bhul jaunga Ayaadat-e-habib se wo aaj zindagi mili KHushi bhi chaunk chauk uThi gham ki aankh khul gai Agarche doctor ne mujh ko maut se bacha liya Par is ke baad us nigah ne mujhe jila liya Nigah-e-yar tujh se apni manzilen main paunga Tujhe jo bhul jaunga to rah bhul jaunga (4) Qarib-tar main ho chala hun dukh ki kaenat se Main ajnabi nahin raha hayat se mamat se Wo dukh sahe ki mujh pe khul gaya hai dard-e-kaenat Hai apne aansuon se mujh pe aaina gham-e-hayat Ye be-qusur jaan-dar dard jhelte hue Ye KHak-o-KHun ke putle apni jaan pe khelte hue Wo zist ki karah jis se be-qarar hai faza Wo zindagi ki aah jis se kanp uThti hai faza Kafan hai aansuon ka dukh ki mari kaenat par Hayat kya inhen haqiqaton se hona be-KHabar Jo aankh jagti rahi hai aadmi ki maut par Wo abr-e-rang-rang ko bhi dekhti hai sada-tar Sikha gaya dukh mera purani pir jaanna Nigah-e-yar thi jahan bhi aaj meri rahnuma Yahi nahin ki mujh ko aaj zindagi nai mili Haqiqat-e-hayat mujh pe sau tarah se khul gai Gawah hai ye sham aur nigah-e-yar hai gawah KHayal-e-maut ko main apne dil mein ab na dunga rah Jiyunga han jiyunga ai nigah-e-ashna-e-yar Sada suhag zindagi hai aur jahan sada-bahaar (5) Abhi to kitne na-shunida naghma-e-hayat hain Abhi nihan dilon se kitne raaz-e-kaenat hain Abhi to zindagi ke na-chashida ras hain saikDon Abhi to hath mein hum ahl-e-gham ke jas hain saikDon Abhi wo le rahi hain meri shaeri mein karwaTen Abhi chamakne wali hai chhupi hui haqiqaten Abhi to bahr-o-bar pe so rahi hain meri wo sadaen SameT lun unhen to phir wo kaenat ko jagaen Abhi to ruh ban ke zarre zarre mein samaunga Abhi to subh ban ke main ufuq pe thartharaunga Abhi to meri shaeri haqiqaten luTaegi Abhi meri sada-e-dard ek jahan pe chhaegi Abhi to aadmi asir-e-dam hai ghulam hai Abhi to zindagi sad-inqalab ka payam hai Abhi tamam zaKHm o dagh hai tamaddun-e-jahan Abhi ruKH-e-bashar pe hain bahmiyat ki jhaiyan Abhi mashiyyaton pe fath pa nahin saka bashar Abhi muqaddaron ko bas mein la nahin saka bashar Abhi to is dukhi jahan mein maut hi ka daur hai Abhi to jis ko zindagi kahen wo chiz aur hai Abhi to KHun thokti hai zindagi bahaar mein Abhi to rone ki sada hai naghma-e-sitar mein Abhi to uDti hain ruKH-e-bahaar par hawaiyan Abhi to didani hain har chaman ki be-fazaiyan Abhi faza-e-dahr legi karwaTon pe karwaTen Abhi to soti hain hawaon ki wo sansanahaTen Ki jis ko sunte hi hukumaton ke rang-e-ruKH uDen ChapeTen jin ki sarkashon ki gardanen maroD den Abhi to sina-e-bashar mein sote hain wo zalzale Ki jin ke jagte hi maut ka bhi dil dahal uThe Abhi to batn-e-ghaib mein hai is sawal ka jawab KHuda-e-KHair-o-shar bhi la nahin saka tha jis ki tab Abhi to god mein hain dewtaon ki wo mah-o-sal Jo denge baDh ke barq-e-tur se hayat ko jalal Abhi rag-e-jahan mein zindagi machalne wali hai Abhi hayat ki nai sharab Dhalne wali hai Abhi chhuri sitam ki Dub kar uchhalne wali hai Abhi to hasrat ek jahan ki nikalne wali hai Abhi ghan-garaj sunai degi inqalab ki Abhi to gosh-bar-sada hai bazm aaftab ki Abhi to punji-wad ko jahan se miTana hai Abhi to samrajon ko saza-e-maut pana hai Abhi to dant pisti hai maut shahryaron ki Abhi to KHun utar raha hai aaankhon mein sitaron ki Abhi to ishtirakiyat ke jhanDe gaDne wale hain Abhi to jaD se kisht-o-KHun ke nazm ukhaDne wale hain Abhi kisan-o-kaamgar raj hone wala hai Abhi bahut jahan mein kaam-kaj hone wala hai Magar abhi to zindagi musibaton ka nam hai Abhi to nind maut ki mere liye haram hai Ye sab payam ek nigah mein wo aankh de gai Ba-yak-nazar kahan kahan mujhe wo aankh le gai