sitaaron se ulajhtaa jaa raha hoon

Sitaaron se ulajhtaa jaa raha hoon Shab-e-furqat bahut ghabraa raha hoon Tire gham ko bhee kuch bahlaa raha hoon Jahaan ko bhee samajhtaa jaa raha hoon Yaqeen ye hai haqeeqat khul rahi hai Gumaan ye hai ki dhoke khaa raha hoon Agar mumkin ho le le apnee aahaT Khabar do husn ko main aa raha hoon Haden husn-o-mohabbat kee milaa kar Qayaamat par qayaamat Dhaa raha hoon Khabar hai tujh ko ai zabt-e-mohabbat Tire haathon men luTtaa jaa raha hoon Asar bhee le raha hoon teree chup kaa Tujhe qaa.il bhee kartaa jaa raha hoon Bharam tere sitam kaa khul chukaa hai Main tujh se aaj kyuun sharmaa raha hoon Unheen men raaz hain gul-baariyon ke Main jo chingaariyaan barsaa raha hoon Jo un ma.asoom aankhon ne diye the Wo dhoke aaj tak main khaa raha hoon Tire pahloo men kyuun hota hai mahsoos Ki tujh se duur hota jaa raha hoon Had-e-jor-o-karam se baDh chalaa husn Nigaah-e-yaar ko yaad aa raha hoon Jo uljhee thee kabhi aadam ke haathon Wo gutthee aaj tak suljhaa raha hoon Mohabbat ab mohabbat ho chalee hai Tujhe kuch bhooltaa saa jaa raha hoon Ajal bhee jin ko sun kar jhoomtee hai Wo naghme zindagee ke gaa raha hoon Ye sannaaTaa hai mere paanv kee chaap 'firaaq' apnee kuch aahaT paa raha hoon