vaqt e guruub aaj karaamaat ho gaii
— Firaq Gorakhpuri
Vaqt-e-ghuroob aaj karaamaat ho ga.ee
Zulfon ko us ne khol diyaa raat ho ga.ee
Kal tak to us men aisee karaamat na thee koee
Wo aankh aaj qibla-e-haajaat ho ga.ee
Ai soz-e-ishq too ne mujhe kya banaa diyaa
Meree har ek saans munaajaat ho ga.ee
Ochhee nigaah Daal ke ik samt rakh diyaa
Dil kya diyaa ghareeb kee saughaat ho ga.ee
Kuch yaad aa ga.ee thee wo zulf-e-shikan-shikan
Hastee tamaam chashma-e-zulmaat ho ga.ee
Ahl-e-vatan se duur judaa.ee men yaar kee
Sabr aa gaya 'firaaq' karaamaat ho ga.ee