ye narm narm havaa jhilmilaa rahe hain charaag
— Firaq Gorakhpuri
Ye narm narm havaa jhilmilaa rahe hain charaagh
Tire khayaal kee khushboo se bas rahe hain dimaagh
Dilon ko tere tabassum kee yaad yuun aa.ee
Ki jagmagaa uThen jis tarah mandiron men charaagh
Jhalaktee hai khinchee shamsheer men na.ee Dunya
Hayaat o maut ke milte naheen hain aaj dimaagh
Hareef-e-seena-e-majrooh o aatish-e-gham-e-ishq
Na gul kee chaak-garebaaniyaan na laale ke daagh
Wo jin ke haal men lau de uThe gham-e-fardaa
Vahee hain anjuman-e-zindagee ke chashm-o-charaag
Tamaam sho.ala-e-gul hai tamaam mauj-e-bahaar
Ki taa-had-e-nigah-e-shauq lahlahaate hain baagh
Na.ee zameen nayaa aasmaan na.ee Dunya
Sunaa to hai ki mohabbat ko in dinon hai faraagh
Jo tohmaten na uTheen ik jahaan se un ke samet
Gunaahgaar-e-mohabbat nikal ga.e be-daagh
Jo chhup ke taaron kee aankhon se paanv dhartaa hai
Usee ke naqsh-e-kaf-e-paa se jal uThe hain charaagh
Jahaan-e-raaz huee jaa rahee hai aankh tiree
Kuch is tarah wo dilon kaa lagaa rahee hai suraagh
Zamaana kuud paDaa aag men yahee kah kar
Ki Khoon chaaT ke ho jaa.egee ye aag bhee baagh
Nigaahen matl.a-e-nau par hain ek aalam kee
Ki mil raha hai kisee phooTtee kiran kaa suraagh
Dilon men daagh-e-mohabbat kaa ab ye aalam hai
Ki jaise niind men Duube hon pichhlee raat charaagh
'firaaq' bazm-e-charaaghaan hai mahfil-e-rindaan
Saje hain pighlee huee aag se chhalakte ayaagh