ye nikhaton ki narm ravii ye havaa ye raat

Ye nik.haton kee narm-ravee ye havaa ye raat Yaad aa rahe hain ishq ko TuuTe ta.alluqaat Maayoosiyon kee god men dam toDtaa hai ishq Ab bhee koi banaa le to bigDee nahin hai baat Kuch aur bhee to ho in ishaaraat ke sivaa Ye sab to ai nigaah-e-karam baat baat baat Ik umr kaT ga.ee hai tire intizaar men Aise bhee hain ki kaT na sakee jin se ek raat Ham ahl-e-intizaar ke aahaT pe kaan the ThanDee havaa thee gham thaa tiraa Dhal chalee thee raat Yuun to bachee bachee see uThee wo nigaah-e-naaz Dunya-e-dil men ho hee ga.ee koi vaardaat Jin kaa suraagh paa na sakee gham kee ruuh bhee Naadaan hue hain ishq men aise bhee saanehaat Har sa.ee o har amal men mohabbat kaa haath hai Ta.ameer-e-zindagee ke samajh Kuch muharrikaat Us jaa tiree nigaah mujhe le ga.ee jahaan Letee ho jaise saans ye be-jaan kaa.enaat Kya niind aa.e us ko jise jaagnaa na aa.e Jo din ko din kare wo kare raat ko bhee raat Dariya ke madd-o-jazr bhee paanee ke khel hain Hastee hee ke karishme hain kya maut kya hayaat Ahl-e-razaa men shaan-e-baghaavat bhee ho zaraa Itnee bhee zindagee na ho paaband-e-rasmiyaat Ham ahl-e-gham ne rang-e-zamaana badal diyaa Koshish to kee sabhee ne magar ban paDe kee baat Paidaa kare zameen na.ee aasmaan nayaa Itnaa to le koi asar-e-daur-kaa.enaat Shaa.ir hoon gahree niind men hain jo haqeeqaten Chaunkaa rahe hain un ko bhee mere tavahhumaat Mujh ko to gham ne fursat-e-gham bhee na dee 'firaaq' De fursat-e-hayaat na jaise gham-e-hayaat