ye surmaii fazaaon ki kunmunaahaten

Ye surma.ee fazaaon kee kunmunaahaTen Miltee hain mujh ko pichhle pahar teree aahaTen Is kaa.enaat-e-gham kee fasurda fazaaon men Bikhraa ga.e hain aa ke wo Kuch muskuraahaTen Ai jism-e-naazneen-e-nigaar-e-nazar-navaaz Sub.h-e-shab-e-visaal teree malgujaahaTen PaDtee hai aasmaan-e-mohabbat pe chhooT see Balbe jabeen-e-naaz tiree jagmagaahaTen Chaltee hai jab naseem-e-khayaal-e-khiraam-e-naaz Suntaa hoon daamanon kee tire sarsaraahaTen Chashm-e-siyah tabassum-e-pinhaan liye hue Pau phooTne se qabl ufuq kee adaahaten Jumbish men jaise shaakh ho gul-haa-e-naghma kee Ik paikar-e-jameel kee ye lahlahaahaTen Jhonkon kee nazr hai chaman-e-intizaar-e-dost Yaad-e-ummeed-o-beem kee ye sansanaahaTen Ho saamnaa agar to khajil ho nigaah-e-barq Dekhee hain uzv uzv men wo achpalaahaTen Kis des ko sidhaar ga.iin ai jamaal-e-yaar Rangeen labon pe khel ke Kuch muskuraahaTen Rukhsaar-e-tar se taaza ho baagh-e-adan kee yaad Aur us kee pahlee sub.h kee wo rasmasaahaTen Saaz-e-jamaal kee ye navaa-haa-e-sarmadee Joban to wo farishte sunen gungunaahaTen Aazurdagee-e-husn bhee kis darja shokh hai Ashkon men tairtee huee Kuch muskuraahaTen Hone lagaa hoon khud se qareen ai shab-e-alam Main paa raha hoon hijr men Kuch apnee aahaTen Meree ghazal kee jaan samajhnaa unhen 'firaaq' Sham-e-khayaal-e-yaar kee ye thartharaahaTen