ye to nahiin ki gam nahiin
— Firaq Gorakhpuri
Ye to nahin ki gham nahin
Haan miree aankh nam nahin
Nashsha sambhaale hai mujhe
Bahke hue qadam nahin
Kahte ho dahr ko bharam
Mujh ko to ye bharam nahin
Aur hee hai maqaam-e-dil
Dair nahin haram nahin
Tum bhee to tum nahin ho aaj
Ham bhee to aaj ham nahin
Kya miree zindagee tiree
Bhoolee huee qasam nahin
'ghaalib'-o-'meer'-o-'mus.hafee'
Ham bhee 'firaaq' kam nahin