zer o bam se saaz e khilqat ke jahaan bantaa gaya

Zer-o-bam se saaz-e-khilqat ke jahaan bantaa gaya Ye zameen bantee ga.ee ye aasmaan bantaa gaya Daastaan-e-jaur-e-behad khuun se likhtaa raha Qatra qatra ashk-e-gham kaa be-karaan bantaa gaya Ishq-e-tanhaa se huiin aabaad kitnee manzilen Ik musaafir kaarvaan-dar-kaarvaan bantaa gaya Main tire jis gham ko apna jaantaa thaa wo bhee to Zeb-e-unvaan-e-hadees-e-deegaraan bantaa gaya Baat nikle baat se jaise wo thaa teraa bayaan Naam teraa daastaan-dar-daastaan bantaa gaya Ham ko hai ma.aloom sab roodaad-e-ilm-o-falsafa Haan har eemaan-o-yaqeen vahm-o-gumaan bantaa gaya Main kitaab-e-dil men apna haal-e-gham likhtaa raha Har varaq ik baab-e-taareekh-e-jahaan bantaa gaya Bas usee kee tarjumaanee hai mire ash.aar men Jo sukoot-e-raaz rangeen daastaan bantaa gaya Main ne saunpaa thaa tujhe ik kaam saaree umr men Wo bigaDtaa hee gaya ai dil kahaan bantaa gaya Vaardaat-e-dil ko dil hee men jagah dete rahe Har hisaab-e-gham hisaab-e-dostaan bantaa gaya Meree ghuTTee men paDee thee ho ke hal urdu zabaan Jo bhee main kahtaa gaya husn-e-bayaan bantaa gaya Vaqt ke haathon yahaan kya kya khazaane luT ga.e Ek teraa gham ki ganj-e-shaa.eegaan bantaa gaya Sar-zameen-e-hind par aqvaam-e-aalam ke 'firaaq' Qaafile baste ga.e hindostaan bantaa gaya