zindagii dard ki kahaanii hai

Zindagee dard kee kahaanee hai Chashm-e-anjum men bhee to paanee hai Be-niyaazaana sun liyaa gham-e-dil Mehrbaanee hai mehrbaanee hai Wo bhalaa meree baat kya maane Us ne apnee bhee baat maanee hai Shola-e-dil hai ye ki sho.ala-saaz Yaa tiraa shola-e-javaanee hai Wo kabhi rang wo kabhi khushboo Gaah gul gaah raat-raanee hai Ban ke ma.asoom sab ko taaD ga.ee Aankh us kee baDee siyaanee hai Aap-beetee kaho ki jag-beetee Har kahaanee miree kahaanee hai Donon aalam hain jis ke zer-e-nageen Dil usee gham kee raajdhaanee hai Ham to khush hain tiree jafaa par bhee Be-sabab teree sargiraanee hai Sar-ba-sar ye faraaz-e-mahr-o-qamar Teree uThtee huee javaanee hai Aaj bhee sun rahe hain qissa-e-ishq Go kahaanee bahut puraanee hai Zabt kiije to dil hai angaaraa Aur agar roiye to paanee hai Hai Thikaanaa ye dar hee us kaa bhee Dil bhee teraa hee aastaanee hai Un se aise men jo na ho jaa.e Nau-javaanee hai nau-javaanee hai Dil miraa aur ye gham-e-Dunya Kya tire gham kee paasbaanee hai Gardish-e-chashm-e-saaqee-e-dauraan Daur-e-aflaak kee bhee paanee hai Ai lab-e-naaz kya hain wo asraar Khaamushee jin kee tarjumaanee hai Mai-kadon ke bhee hosh uDne lage Kya tiree aankh kee javaanee hai Khud-kushee par hai aaj aamaada Are Dunya baDee divaanee hai Koi iz.haar-e-naa-khushee bhee nahin Bad-gumaanee see bad-gumaanee hai Mujh se kahtaa thaa kal farishta-e-ishq Zindagee hijr kee kahaanee hai Bahr-e-hastee bhee jis men kho jaa.e Buund men bhee wo be-karaanee hai Mil ga.e khaak men tire ushshaaq Ye bhee ik amr-e-aasmaanee hai Zindagee intizaar hai teraa Ham ne ik baat aaj jaanee hai Kyuun na ho gham se hee qimaash us kaa Husn tasveer-e-shaadmaanee hai Suunee Dunya men ab to main hoon aur Maatam-e-ishq-e-aan-jahaanee hai Kuch na poochho 'firaaq' ahd-e-shabaab Raat hai niind hai kahaanee hai