ruke ruke se qadam ruk ke baar baar chale
— Gulzar
Ruke ruke se qadam ruk ke baar baar chale
Qaraar de ke tire dar se be-qaraar chale
UThaa.e phirte the ehsaan jism kaa jaan par
Chale jahaan se to ye pairahan utaar chale
Na jaane kaun see miTTee vatan kee miTTee thee
Nazar men dhuul jigar men liye ghubaar chale
Sahar na aa.ee ka.ee baar niind se jaage
Thee raat raat kee ye zindagee guzaar chale
Milee hai sham.a se ye rasm-e-aashiqee ham ko
Gunaah haath pe le kar gunaahgaar chale