kabhi to mehrbaan ho kar bulaa len

Kabhi to mehrbaan ho kar bulaa len Ye mahvash ham faqeeron kee duaa len Na jaane phir ye rut aa.e na aa.e Javaan phoolon kee kuch khushboo churaa len Bahut ro.e zamaane ke liye ham Zaraa apne liye aansoo bahaa len Ham un ko bhoolne vaale nahin hain Samajhte hain gham-e-dauraan kee chaalen Hamaaree bhee sambhal jaa.egee haalat Vo pahle apnee zulfen to sambhaalen Nikalne ko hai wo mahtaab ghar se Sitaaron se kaho nazren jhukaa len Ham apne raaste par chal rahe hain Janaab-e-shaikh apna raasta len Zamaana to yoonhee rooThaa rahegaa Chalo 'jaalib' unhen chal kar manaa len Kabhi to mehrban ho kar bula len Ye mahwash hum faqiron ki dua len Na jaane phir ye rut aae na aae Jawan phulon ki kuch KHushbu chura len Bahut roe zamane ke liye hum Zara apne liye aansu baha len Hum un ko bhulne wale nahin hain Samajhte hain gham-e-dauran ki chaalen Hamari bhi sambhal jaegi haalat Wo pahle apni zulfen to sambhaalen Nikalne ko hai wo mahtab ghar se Sitaron se kaho nazren jhuka len Hum apne raste par chal rahe hain Janab-e-shaiKH apna rasta len Zamana to yunhi ruTha rahega Chalo 'jalib' unhen chal kar mana len