adaa pariyon kii suurat huur kii aankhen gazaalon kii

Adaa pariyon kee soorat huur kee aankhen ghazaalon kee Gharaz maange kee har ik chiiz hai in husn vaalon kee Bajaa.e-raqs mai-khaane men hai gardish piyaalon kee Takalluf-bar-taraf ye bazm hai allaah vaalon kee Nishaan jab miT gayaa turbat kaa aa.e faatiha paDhne Unhen kab yaad aa.ee hain vafaa.en marne vaalon kee Huaa do gaz kafan mun'im ko haasil maal-e-duniyaa se Bandhee rakkhee hee aakhir rah ga.ee gaThree doshaalon kee Dukhaa kar dil miraa phir aap hee uzr-e-jafaa karnaa Are kaafir tiree ik chaal hai ye laakh chaalon kee Abhee tum ko bahut kuchh naaz hai tirchhee nigaahon par Magar dekhee naheen taaseer tum ne mere naalon kee Tire hote hue ye baat ghairat kee hai o zaalim UDaa.e aasmaan yuun khaak teree paa.emaalon kee Bhale hain yaa bure jo kuchh hain bande to khudaa ke hain Nadaamat is qadar vaa'iz na kar mai-khaane vaalon kee Huee bauchhaar mujh par shikva-e-bejaa kee phir kyaa kyaa Jahaan chheDaa unhen bas khul ga.ee gaThree malaalon kee Gunahgaar-e-mohabbat hain jidhar guzrenge mahshar men Hamaare saath saath ik bhiiD hogee khush-jamaalon kee Farishton se 'hafeez' ik din lahad men guftugoo hogee Abhee se fikr laazim hai tumhen un ke savaalon kee