baith jaataa huun jahaan chhaanv ghanii hotii hai

BaiTh jaataa huun jahaan chhaanv ghanee hotee hai Haa.e kyaa chiiz ghareeb-ul-vatanee hotee hai Naheen marte hain to iizaa naheen jhelee jaatee Aur marte hain to paimaan-shikanee hotee hai Din ko ik nuur barastaa hai miree turbat par Raat ko chaadar-e-mahtaab tanee hotee hai Tum bichhaDte ho jo ab karb na ho vo kam hai Dam nikaltaa hai to a.azaa-shikanee hotee hai Zinda dar-gor ham aise jo hain marne vaale Jeete-jee un ke gale men kafanee hotee hai Rut badalte hee badal jaatee hai niyyat meree Jab bahaar aatee hai tauba-shikanee hotee hai Ghair ke bas men tumhen sun ke ye kah uThtaa huun Aisee taqdeer bhee allaah ghanee hotee hai Na baDhe baat agar khul ke karen vo baaten Baa.is-e-tool-e-sukhan kam-sukhanee hotee hai LuT gayaa vo tire kooche men dharaa jis ne qadam Is tarah kee bhee kaheen raahzanee hotee hai Husn vaalon ko zid aa jaa.e khudaa ye na kare Kar guzarte hain jo kuchh jee men Thanee hotee hai Hijr men zahr hai saaghar kaa lagaanaa munh se Mai kee jo buund hai hiire kee kanee hotee hai Mai-kashon ko na kabhee fikr-e-kam-o-besh rahee Aise logon kee tabee'at bhee ghanee hotee hai Huuk uThtee hai agar zabt-e-fughaan kartaa huun Saans ruktee hai to barchhee kee anee hotee hai Aks kee un pe nazar aa.ine pe un kee nigaah Do kamaan-daaron men naavak-faganee hotee hai Pee lo do ghoonT ki saaqee kee rahe baat 'hafeez' Saaf inkaar se khaatir-shikanee hotee hai