bataauun kyaa kisii ko main ki tum kyaa chiiz ho kyaa ho
— Hafeez Jaunpuri
Bataa.oon kyaa kisee ko main ki tum kyaa chiiz ho kyaa ho
Miree hasrat mire armaan ho meree tamannaa ho
Mohabbat men qalaq ho ranj ho sadma ho iizaa ho
Ye sab kuchh ho koee parda-nasheen lekin na rusvaa ho
Tum apne husn kee kyaa bul-havas se daad paaoge
Use poochho mire dil se ki tum kyaa chiiz ho kyaa ho
Mire dil ko na mal talvon se apne men ye Dartaa huun
Kaheen aisaa na ho us men koee khaar-e-tamannaa ho
Na dekhoon kis tarah husn-e-khudaa-daad un haseenon kaa
Bhalaa un zaahidon kee tarah kaun aankhon kaa andhaa ho
Tiree tasveer bhee hai baa.is-e-dil-bastagee lekin
Use taskeen kyaa ho jo tiree baaton pe martaa ho
'hafeez' aanaa huaa hai phir azeemaabaad men apnaa
Phir agle valvale paidaa hue ab dekhiye kyaa ho