chaak e daamaan na rahaa chaak e garebaan na rahaa

Chaak-e-daamaan na rahaa chaak-e-garebaan na rahaa Phir bhee posheeda miraa haal-e-pareshaan na rahaa Bazm-e-dushman na kabhee darham-o-barham dekhee Kyaa tiraa daur vo ai gardish-e-dauraan na rahaa Mujh ko afsos ki vo aur adoo ke bas men Us ko ye gham ki miraa ab koee pursaan na rahaa Ham ne jo baat kahee thee vahee aakhir ko huee Tum ne jo raaz chhupaayaa thaa vo pinhaan na rahaa Munfa.il tark-e-vafaa ne mujhe barson rakkhaa Chaar din apne kiye par vo pashemaan na rahaa Un kee shokhee bhee huee hai miree vahshat kaa javaab Haath Daalaa jo garebaan men garebaan na rahaa Ban ga.ee daagh kaleje kaa tamannaa-e-visaal Daagh-e-hasrat ke sivaa ab koee armaan na rahaa Khair sab qaul-o-qasam jhuuT sahee khush rahiye Ab mire aap ke vo ahd vo paimaan na rahaa Rokne ko mujhe ghairat ke sivaa is dar par Koee darbaan na rahaa koee nigahbaan na rahaa MiT gayaa shaghl-e-junoon ab vo kahaan jaama-daree Zor vahshat kaa bhee ab dast-o-garebaan na rahaa Chaar jhiDkee men tire dar se alag ho baiThaa Ghair kuchh roz bhee minnat-kash-e-darbaan na rahaa Vaqt ko haath se kho kar koee duniyaa men 'hafeez' Umr-bhar meree tarah sar-ba-garebaan na rahaa