dil hai to tire vasl ke armaan bahut hain
— Hafeez Jaunpuri
Dil hai to tire vasl ke armaan bahut hain
Ye ghar jo salaamat hai to mehmaan bahut hai
Main daad kaa khvaahaan naheen ai daavar-e-mahshar
Aaj apne kiye par vo pashemaan bahut hain
Dil le ke khilaune kee tarah toD na Daalen
Dar mujh ko yahee hai ki vo naadaan bahut hain
Vo phuul chaDhaate hain dabee jaatee hai turbat
Ma.ashooq ke thoDe se bhee ehsaan bahut hain
Tum ko na pasand aa.e na lo pher do mujh ko
Is dil ke khareedaar miree jaan bahut hain
DaanTaa kabhee ghamze ne kabhee naaz ne Tokaa
Khalvat men bhee saath un ke nigahbaan bahut hain
Khaalee bhee koee dil hai vahaan ishq-e-sanam se
Kahne ko to ka.abe men musalmaan bahut hain
Shaayad ye asar ho meree aah-e-saharee kaa
Kuchh sub.h se vo aaj pareshaan bahut hain
Kyaa shab ko 'hafeez' un se yaheen vasl kee Thahree
Aaj aap ke ghar aish ke saamaan bahut hain