dil men hain vasl ke armaan bahut
— Hafeez Jaunpuri
Dil men hain vasl ke armaan bahut
Jam.a is ghar men hain mehmaan bahut
Aa.e to dast-e-junoon zoron par
Chaak karne ko garebaan bahut
Meree jaanib se dil us kaa na phiraa
Dushmanon ne to bhare kaan bahut
Le ke ik dil gham-e-kaunain diyaa
Aap ke mujh pe hain ehsaan bahut
Tark-e-ulfat kaa hameen ko hai gham
Vo bhee hain dil men pashemaan bahut
Dil ke veeraane kaa hai aalam kuchh aur
Ham ne dekhe hain bayaabaan bahut
Khaak hone ko hazaaron hasrat
Khuun hone ko hain armaan bahut
Sadma-e-hijr uThaanaa mushkil
Jaan denaa to hai aasaan bahut
Rashk jin par hai farishton ko 'hafeez'
Aise duniyaa men hain insaan bahut