dil par lagaa rahii hai vo niichii nigaah chot
— Hafeez Jaunpuri
Dil par lagaa rahee hai vo neechee nigaah choT
Phir choT bhee vo choT jo hai be-panaah choT
PhoDaa sar us ke dar se ki barse junoon men sang
Mujh ko dilaa rahee hai ajab ishtibaah choT
Bijlee kaa naam sunte hee aankhen jhapak ga.iin
Rokegee meree aah kee kyaa ye nigaah choT
Laalach asar kaa ho na kaheen baa.is-e-zarar
Takraa ke sar falak se na khaa jaa.e aah choT
Munh har dahaan-e-zakhm kaa siite hain is liye
Matlab hai hashr men bhee na ho daad-khvaah choT
Miltee hai chup kee daad ye mash.hoor baat hai
Jal jaa.e aasmaan jo kare zabt aah choT
UThte hee dil men Tiis jigar men Tapak huee
Kartee hai dard-e-hijr se goyaa nibaah choT
ChaukhaT pe teree shab ko paTaktaa hai sar 'hafeez'
Baavar na ho to dekh jabeen hai gavaah choT