diyaa jab jaam e mai saaqii ne bhar ke
— Hafeez Jaunpuri
Diyaa jab jaam-e-mai saaqee ne bhar ke
To pachhtaa.e bahut ham tauba kar ke
LipaT jaao gale se vaqt-e-aakhir
Ki phir jiitaa naheen hai koee mar ke
Vahaan se aa ke us kee bhee phiree aankh
Vo tevar hee naheen ab naama-bar ke
Koee jab poochhtaa hai haal dil kaa
To ro dete hain ham ik aah bhar ke
Gulon ke ishq men de jaan bulbul
Are ye hausle ek musht par ke
Khudaa mahfooz rakkhe un kee zid se
Jo kahte hain dikhaa dete hain kar ke
Rahenge khaak men ham ko milaa kar
Tire andaaz is neechee nazar ke
Dimaagh apnaa na kyuun kar arsh par ho
Ye samjho to gadaa hain kis ke dar ke
Huee hai qaid se bad-tar rihaa.ee
Kiyaa aazaad us ne par katar ke
UThe jaate hain lo duniyaa se ham aaj
MiTe jaate hain jhagDe umr bhar ke
'hafeez' ab naala o fariyaad chhoDo
Koee din yuun bhee dekho sabr kar ke