duniyaa men yuun to har koii apnii sii kar gayaa

Duniyaa men yuun to har koee apnee see kar gayaa Zinda hai us kaa naam kisee par jo mar gayaa Sub.h-e-shab-e-visaal hai aa.eena haath men Sharmaa ke kah rahe hain ki chehra utar gayaa Saaqee kee baDh chalee hain jo be-iltifaatiyaan Shaayad hamaaree umr kaa paimaana bhar gayaa Itnaa to jaante hain ki pahloo men dil naheen Us kee khabar naheen ki kahaan hai kidhar gayaa Ham se jo aap ruuTh ke jaate hain jaa.iye Sun leejiyegaa zahr koee khaa ke mar gayaa Jaataa rahaa shabaab to kuchh soojhne lagee Aankhen khuleen sharaab kaa nashsha utar gayaa Naaseh kahaan kaa chheD diyaa too ne aa ke zikr Us kaa khayaal phir mujhe bechain kar gayaa Do din men ye mizaaj kee haalat badal ga.ee Kal sar chaDhaa thaa aaj nazar se utar gayaa Achchhaa huaa jo aap ayaadat ko aa ga.e Sar kaa ye ek bojh thaa vo bhee utar gayaa Tere mareez-e-hijr kaa ab to ye haal hai Aayaa jo dekhne ko vo baa-chashm-e-tar gayaa ChheDaa kisee ne zikr-e-mohabbat jo ai 'hafeez' Dil par ajiib tarah kaa sadma guzar gayaa