karnaa jo mohabbat kaa iqraar samajh lenaa
— Hafeez Jaunpuri
Karnaa jo mohabbat kaa iqraar samajh lenaa
Ik baar naheen us ko sau baar samajh lenaa
Ham hon ki adoo us men jo zulm kaa shaakee ho
Kartaa hee naheen tum ko vo pyaar samajh lenaa
Mar jaa.e magar jaanaa us kee na ayaadat ko
Tum jis ko mohabbat kaa beemaar samajh lenaa
Ban ban ke bigaDtaa hai vo kaam mohabbat men
Aasaan naheen jis ko dushvaar samajh lenaa
Ghaflat-kada-e-hastee jab kahte hain aalam ko
Saudaa hai phir apne ko hushiyaar samajh lenaa
Mahfil men raqeebon kee jaanaa hai agar tum ko
Soorat se mujhe apnee bezaar samajh lenaa
Dil par to lagaate ho tum teer-e-nazar lekin
Aahon ko hamaaree bhee talvaar samajh lenaa
ChheDaa jo mire aage phir tazkira-e-dushman
Rakkhee huee hai mujh se takraar samajh lenaa
Posheeda 'hafeez' is men asraar-e-mohabbat hain
Aasaan naheen mere ash.aar samajh lenaa