khud ba khud aankh badal kar ye savaal achchhaa hai

Khud-ba-khud aankh badal kar ye savaal achchhaa hai Roz kab tak koee poochhaa kare haal achchhaa hai Hijr men aish-e-guzishta kaa khayaal achchhaa hai Ho jhalak jis men khushee kee vo ma.aal achchhaa hai Daagh behtar hai vahee ho jo dil-e-aashiq men Jaur hai aariz-e-khoobaan pe vo khaal achchhaa hai Dekh un khaak ke putlon kee adaa.en zaahid Un se kis baat men hooron kaa jamaal achchhaa hai Keejiye aur bhee shikve ki miTe dil kaa ghubaar Baaton baaton men nikal jaa.e malaal achchhaa hai Tandurustee se to behtar thee miree beemaaree Vo kabhee poochh to lete the ki haal achchhaa hai Jo nigaahon men samaa jaa.e vo soorat achchhee Jo khareedaar ko jach jaa.e vo maal achchhaa hai Chaaragar ko mire ye bhee naheen tam.eez abhee Kaun saa haal buraa kaun saa haal achchhaa hai De khudaa zar to koee mai-kada aabaad karen Achchhe kaamon men jo ho sarf vo maal achchhaa hai Hans ke kahte hain kabhee haath se uDne kaa naheen Taa.ir-e-rang-e-hinaa be-par-o-baal achchhaa hai Jo na nikle kabhee dil se vo tamannaa achchhee Jo na aa.e kabhee lab tak vo savaal achchhaa hai Hasrat aatee hai hamen haal par apne kyaa kyaa Sunte hain jab kisee beemaar kaa haal achchhaa hai Huur ke zikr par aa.eena uThaa kar dekhaa Us se eemaan hai ki meraa hee jamaal achchhaa hai Aarzoo meree na puuree ho koee baat hai ye Kaash itnaa vo samajh len ki savaal achchhaa hai Muft miltaa hai kharaabaat men har mai-kash ko Tharraa piine ke liye jaam-e-sifaal achchhaa hai SainkaDon barq-jamaalon kaa guzar hotaa hai Toor-e-seenaa se miraa baam-e-khayaal achchhaa hai Huun gadaa-e-dar-e-mai-khaana takalluf se baree TooTaa-phooTaa ye meraa jaam-e-sifaal achchhaa hai Haal sunte naheen be-khud hain ye masjid vaale Un se kuchh mai-kade vaalon hee kaa haal achchhaa hai Daf.atan tark-e-mohabbat men zarar hai jee kaa Rafta rafta jo miTe dil se khayaal achchhaa hai Ab ke har shahr men phailaa hai jo taa.oon 'hafeez' Marne vaalon ko khushee hai ki ye saal achchhaa hai