kisii ko dekh kar be khud dil e kaam ho jaanaa
— Hafeez Jaunpuri
Kisee ko dekh kar be-khud dil-e-kaam ho jaanaa
Usee ko log kahte hain khayaal-e-khaam ho jaanaa
Mohabbat se jo pesh aa.e koee ho dost yaa dushman
Hamen to har kisee kaa banda-e-be-daam ho jaanaa
Khudaa jaane ki kyaa hotaa ma.aal apnee mohabbat kaa
Bahut achchhaa huaa aaghaaz men anjaam ho jaanaa
MiTaanaa ho agar dhabbaa riyaa-kaaree kaa ai zaahid
Kisee kee bazm men ik din shareek-e-jaam ho jaanaa
Jahaan dekho vahaan kuchh zikr hai apnee mohabbat kaa
Buraa hai aadmee ke vaaste badnaam ho jaanaa
Karegaa rakhna paidaa koee din darbaan kaa hangaama
Qayaamat hai tire dar par hujoom-e-aam ho jaanaa
'hafeez' aise musalmaan kaa bhee koee deen-o-maz.hab hai
Buton kee dostee men taarik-e-islaam ho jaanaa