likh de aamil koii aisaa taaviiz

Likh de aamil koee aisaa ta.aveez Yaar ho jaa.e gale kaa ta.aveez Kab musakhkhar ye haseen hote hain Sab ye be-kaar hai ganDaa-ta.aveez Na huaa yaar kaa ghussa ThanDaa Baar-haa dho ke pilaayaa ta.aveez Sar se gesoo kee balaa jaatee hai Laa.e to radd-e-balaa kaa ta.aveez Mar ke bhee dil kee taDap itnee hai Shaq huaa meree lahad kaa ta.aveez Har tarah hotee hai maayoosee jab Log karte hain duaa yaa ta.aveez Aarzoo khaak men dushman kee mile Is liye dafn kiyaa thaa ta.aveez Haath se apne jo likkhaa us ne Ham ne us khat ko banaayaa ta.aveez Jis se aayaa huaa dil ruk jaa.e Koee aisaa bhee hai laTkaa ta.aveez Dil paseejaa na kisee din un kaa Roz likh likh ke jalaayaa ta.aveez Kaam lo jazb-e-mohabbat se 'hafeez' Naqsh kyaa chiiz hai kaisaa ta.aveez