munh miraa ek ek taktaa thaa
— Hafeez Jaunpuri
Munh miraa ek ek taktaa thaa
Us kee mahfil men main tamaashaa thaa
Ham jo tujh se phiren khudaa se phiren
Yaad hai kuchh ye qaul kis kaa thaa
Vasl men bhee rahaa firaaq kaa gham
Shaam hee se sahar kaa khaTkaa thaa
Apnee aankhon kaa kuchh qusoor naheen
Husn hee dil-fareb is kaa thaa
Faatiha paDh rahe the vo jab tak
Meree turbat par ek melaa thaa
Naama-bar naama jab diyaa too ne
Kuchh zabaanee bhee us ne poochhaa thaa
Ab kuchh is kaa bhee e.atibaar naheen
Pahle dil par baDaa bharosaa thaa
Vo jo ruk ruk ke poochhte the haal
Dil men rah rah ke dard uThtaa thaa
JooThaa va.ada bhee ai 'hafeez' un kaa
Zindagee kaa miree sahaaraa thaa