patthar se na maaro mujhe diivaana samajh kar

Patthar se na maaro mujhe deevaana samajh kar Aayaa huun idhar koocha-e-jaanaana samajh kar Kahte hain ye rone se lagee dil kee bujhegee Samjhaate hain apnaa mujhe parvaana samajh kar Main vo huun ki seree mujhe hotee naheen mai se Denaa mire saaqee mujhe paimaana samajh kar Nakhvat se jo ik baat na sunte the hamaaree Khud chheD rahe hain hamen deevaana samajh kar Ham un ke hain dil un kaa hai jaan un kee hai lekin Phir munh ko chhupaate hain vo begaana samajh kar Rakkhaa na kaheen kaa hamen barbaadi-e-dil ne Armaan Thaharte naheen veeraana samajh kar Dekh aap se baahar na ho mansoor kee soorat Karnaa hai to kar naara-e-mastaana samajh kar Ham aur hee kuchh DhoonDte phirte hain buton men But-khaane men jaate naheen but-khaana samajh kar Khoobaan se paTe yaa na paTe vasl kaa saudaa Dil pahle hee le lete hain bai.aana samajh kar Saaqee kee jo aankhon ko huee bazm men gardish Ham lauT ga.e gardish-e-paimaana samajh kar Kah jaate 'hafeez' un ko ho tum josh men kyaa kuchh Vo tarah diye jaate hain deevaana samajh kar