qaasid khilaaf e khat kahiin teraa bayaan na ho

Qaasid khilaaf-e-khat kaheen teraa bayaan na ho Karnaa sambhal ke baat ki vo bad-gumaan na ho Naalon kaa mere aaTh-pahr imtihaan na ho Darte naheen ki ek zameen aasmaan na ho Tohmat ho bhool-chook kee paighaambar ke sar Shikvon kaa lutf kyaa jo koee darmiyaan na ho Naalon se laD rahee hai sadaa-e-jaras jo aaj Gum-karda-raah koee pas-e-kaarvaan na ho Sau sun ke ek bhee na kahen ham bajaa durust Us se ye kahiye aa.e ki jis ke zabaan na ho Ab tak vo yaad hain miree aglee inaayaten Bas bas hamaare haal pe too mehrbaan na ho ChhooTee tiree galee to ye mujh ko yaqeen huaa Jannat hai vo jahaan sitam-e-aasmaan na ho Karte hain ek ek se meree shikaayaten Sirf is khayaal se ki koee bad-gumaan na ho Ye kyaa ki sar chaDhaa ke nazar se giraa diyaa Ab mehrbaan hue ho to naa-mehrbaan na ho Dil ko kahaan hai sadma-e-rashk-e-adoo kee taab Sau imtihaan hain aur ye ik imtihaan na ho Marnaa phaDak phaDak ke gavaaraa sahee magar Itnaa to ho qafas men gham-e-aashiyaan na ho Ka.abe men but-kade men kharaabaat men rahe Insaan vo hai kaheen jo kisee par garaan na ho Apnee bhee sar-guzasht hai ik-tarfa daastaan Barson suno to nisf ye qissa bayaan na ho Dil se hai dil ko raah ye sach hai agar 'hafeez' Mumkin naheen khayaal yahaan ho vahaan na ho