saath rahte itnii muddat ho gaii
— Hafeez Jaunpuri
Saath rahte itnee muddat ho ga.ee
Dard ko dil se mohabbat ho ga.ee
Kyaa javaanee jald rukhsat ho ga.ee
Ik chhalaavaa thee ki champat ho ga.ee
Dil kee gaahak achchhee soorat ho ga.ee
Aankh milte hee mohabbat ho ga.ee
Faatiha paDhne vo aa.e aaj kyaa
Thokaron kee nazr turbat ho ga.ee
Laakh beemaaree hai ik parhez-e-mai
Jaan jokhon tark-e-aadat ho ga.ee
Tafraqa Daalaa falak ne baar-haa
Do dilon men jab mohabbat ho ga.ee
Vo gila sun kar hue yuun munfa.il
Aa.ed apne sar shikaayat ho ga.ee
Dostee kyaa us talavvun-tabaa kee
Chaar din saahab salaamat ho ga.ee
Vaah re aalam kamaal-e-ishq kaa
Meree un kee ek soorat ho ga.ee
Un ke jaate hee huee kaayaa palaT
Kham masarrat yaas hasrat ho ga.ee
Pee ke yuun tum kab bahakte the 'hafeez'
Raat kyaa be-lutf sohbat ho ga.ee