shab e visaal lagaayaa jo un ko siine se
— Hafeez Jaunpuri
Shab-e-visaal lagaayaa jo un ko siine se
To hans ke bole alag baiThiye qareene se
Savaab ho ki na ho is se kyaa gharaz zaahid
Maza milaa mujhe tujh ko pilaa ke piine se
Shab-e-firaaq ye ehsaan hai tasavvur kaa
Ki so rahaa huun lagaa kar kisee ko siine se
Falak miTaa.egaa mujh ko jo tum mukaddar ho
Adaavat us kee baDhegee tumhaare kiine se
Gham-e-firaaq men kyaa lutf-e-zindagee hai 'hafeez'
Hamen to maut hee behtar hai aise jiine se