shab e visaal ye kahte hain vo sunaa ke mujhe

Shab-e-visaal ye kahte hain vo sunaa ke mujhe Kisee ne luuT liyaa apne ghar bulaa ke mujhe Pukaartaa naheen koee lahad par aa ke mujhe Mire naseeb bhee kyaa so rahe sulaa ke mujhe Vo bole vasl ke shab aap men na paa ke mujhe Chale ga.e hain kahaan apne ghar bulaa ke mujhe Giraa diyaa hai kuchh is tarah us ne aankhon se Ki dekhtaa naheen koee nazar uThaa ke mujhe Paree thee koee chhalaavaa thee yaa javaanee thee Kahaan ye ho ga.ee champat jhalak dikhaa ke mujhe Tumhaaree bazm men aa.e to jaam-e-mai mujh tak Balaa se de de koee zahr hee milaa ke mujhe UThaa jo bazm se un kee to rok kar ye kahaa Ki le chale ho kahaan dil men tum chhupaa ke mujhe Ye tere hijr kaa gham thaa vo tere ishq kaa daagh Gayaa jo khaa ke mujhe jo miTaa miTaa ke mujhe Jahaan pe jaate hue mere hosh uDte hain Tiraa khayaal vahaan le chalaa lagaa ke mujhe Mujhe hai ghash unhen hairat ajiib aalam hai Main kho gayaa huun unhen dekh kar vo paa ke mujhe Miree nigaah men phirtee hai meree maut kee shakl Jab aap dekhte hain tevriyaan chaDhaa ke mujhe Na dekho aa.eena dekho miraa kahaa maano Dikhaao ghair ko soorat na munh dikhaa ke mujhe TaDap le dil kee ye kah kah ke koee aataa hai BiThaa diyaa hai lahad men uThaa uThaa ke mujhe Gale lagaa de karoon pyaar teree tegh ko main Ki yaad aa.e karishme tiree adaa ke mujhe Ye mere rone pe hanstee hai kyuun miree taqdeer Vo apne dil men to kuDhte naheen rulaa ke mujhe Jo miTTee dee hai to ab faatiha bhee paDhte jaao Kuchh ab savaab bhee lo khaak men milaa ke mujhe 'hafeez' hashr men kar hee chukaa thaa main fariyaad Ki us ne DaanT diyaa saamne se aa ke mujhe