shikva karte hain zabaan se na gilaa karte hain
— Hafeez Jaunpuri
Shikva karte hain zabaan se na gilaa karte hain
Tum salaamat raho ham to ye duaa karte hain
Phir mire dil ke phansaane kee huee hai tadbeer
Phir na.e sar se vo paimaan-e-vafaa karte hain
Tum mujhe haath uThaa kar is adaa se koso
Dekhne vaale ye samjhen ki duaa karte hain
In haseenon kaa hai duniyaa se niraalaa andaaz
Shokhiyaan bazm men khalvat men hayaa karte hain
Hashr kaa zikr na kar us kee galee men vaa.iz
Aise hangaame yahaan roz huaa karte hain
Laag hai ham se adoo ko to adoo se hamen rashk
Ek hee aag men ham donon jalaa karte hain
Un kaa shikva na raqeebon kee shikaayat hai 'hafeez'
Sirf ham apne muqaddar kaa gilaa karte hain