subh ko aae ho nikle shaam ke
— Hafeez Jaunpuri
Sub.h ko aa.e ho nikle shaam ke
Jaao bhee ab tum mire kis kaam ke
Haathaa-paa.ee se yahee matlab bhee thaa
Koee munh choome kalaa.ee thaam ke
Tum agar chaaho to kuchh mushkil naheen
Dhang sau hain naama-o-paighaam ke
ChheD vaa'iz har ghaDee achchhee naheen
Rind bhee hain ek apne naam ke
Qahr Dhaa.egee aseeron kee taDap
Aur bhee uljhenge halqe daam ke
Mohtasib chun lene de ik ik mujhe
Dil ke TukDe hain ye TukDe jaam ke
Laakhon dhaDke ibtidaa-e-ishq men
Dhyaan hain aaghaaz men anjaam ke
Mai kaa fatvaa to sahee qaazee se luun
Tok kar raste men daaman thaam ke
Duur daur-e-mohtasib hai aaj-kal
Ab kahaan vo daur-daure jaam ke
Naam jab us kaa zabaan par aa gayaa
Rah gayaa naaseh kalejaa thaam ke
Duur se naale mire sun kar kahaa
Aa ga.e dushman mire aaraam ke
Haa.e vo ab pyaar kee baaten kahaan
Ab to laale hain mujhe dushnaam ke
Vo lagaa.en qahqahe sun kar 'hafeez'
Aap naale keejiye dil thaam ke