us ko aazaadii na milne kaa hamen maqduur hai
— Hafeez Jaunpuri
Us ko aazaadee na milne kaa hamen maqdoor hai
Ham idhar majboor hain aur vo udhar majboor hai
Shab ko chhup kar aa.iye aanaa agar manzoor hai
Aap ke ghar se hamaaraa ghar hee kitnee duur hai
Laakh minnat kee magar ik baat bhee munh se na kee
Aap kee tasveer bhee kitnee baDee maghroor hai
Is andheree raat men ai shaikh pahchaanegaa kaun
Band hai masjid kaa dar to mai-kada kyaa duur hai
Ek rashk-e-ghair kaa sadma to uTh saktaa naheen
Aur jo farmaa.iye sab kuchh hamen manzoor hai
Mar gayaa dushman to us kaa sog tum ko kyaa zaroor
Kaun see ye rasm hai ye kaun saa dastoor hai
Zaahid is ummeed par milnaa haseenon se na chhoD
Khuld men naadaan tere hee liye kyaa huur hai
Hashr ke din kyaa kahenge ye agar aayaa khayaal
Shikva karnaa yaar kaa paas-e-vafaa se duur hai
Kuchh 'hafeez' aisaa naheen jis se ki tum vaaqif na ho
Aadmee vo to bahut maa'roof hai mash.hoor hai