yahii masala hai jo zaahido to mujhe kuchh is men kalaam hai

Yahee mas.ala hai jo zaahido to mujhe kuchh is men kalaam hai Vahee shai halaal hai khuld men vahee mai-kade men haraam hai Miree aankh men jo samaa gayaa mire dil men jis kaa maqaam hai Abhee mujh se hai vo alag-thalag na payaam hai na salaam hai Yahee kahnaa us se payaambar ki bas aakhiree ye payaam hai Jo zaraa bhee jaane men der kee to kisee kaa kaam tamaam hai Kabhee qat' kee miree guftugoo kabhee kah diyaa mujhe kyaa hai too Ye bataa too o but-e-jang-joo koee ye bhee tarz-e-kalaam hai Koee zikr ghair kaa ye na thaa jise aap sun ke hue khafaa Mujhe apne bakht se hai gila mujhe apne dil se kalaam hai Jo chalaa to bazm-e-suroor men jo rahaa to aalam-e-noor men Mire dil men kaif-e-mudaam hai mire sar men gardish-e-jaam hai Vahee shikva tujh ko raqeeb kaa vahee ronaa apne naseeb kaa Ye bataa too o dil-e-mubtalaa tujhe aur bhee koee kaam hai Miraa naam le ke na kosiye ye kahaa to hans ke vo bol uThe Mujhe kyaa khabar thee zamaane men faqat aap hee kaa ye naam hai Mujhe kufr o diin se gharaz naheen ki main ek banda-e-ishq huun Koee shaikh ho ki ho barhaman miraa duur hee se salaam hai Vahee aasmaan hai vahee zameen magar aankh us kee jo phir ga.ee Na vo din hai ab na vo raat hai na vo sub.h hai na vo shaam hai Bahut aur maahir-e-fan hain yuun bahut aur ahl-e-sukhan hain yuun Magar aa gayaa jo pasand unhen vo 'hafeez' hee kaa kalaam hai