aataa hoon jab us galii se sau sau khvaarii khiinch kar
— Hasrat Azimabadi
Aataa hoon jab us galee se sau sau khvaaree kheench kar
Phir vaheen le jaa.e mujh ko be-qaraaree kheench kar
Pahunchaa hai ab to nihaayat ko hamaaraa haal-e-zaar
Laa use jis-tis tarah taaseer-e-zaaree kheench kar
Koh-e-gham rakhtee hai dil par is khiraam-e-naaz se
Khajlat-e-raftaar-e-kabk-e-kohsaaree kheench kar
Kis ke shor-e-ishq se yuun rotaa rahtaa hai sadaa
Naala o fariyaad ye abr-e-bahaaree kheench kar
Baandhoon hoon vaarastagee kaa dil men apne jab khayaal
Baandh le jaa.en hamen zulfen tumhaaree kheench kar
Kal jo too ghar se na niklaa uTh gaya kar ke duaa
Sub.h se taa-shaam main kya intizaaree kheench kar
Gaaliyaan de maar le yaa qatl kar mukhtaar hai
Laa.ee ab to yaan mujhe be-ikhtiyaaree kheench kar
Saaqiyaa paiham pilaa de mujh ko maalaa-maal jaam
Aayaa hoon yaan main azaab-e-hoshyaaree kheench kar
'hasrat' us kee bazm ke jaane se rakh mujh ko muaaf
Muft men ro.egaa vaan se sharmsaaree kheench kar