ab tujh se phiraa ye dil e naakaam hamaaraa
— Hasrat Azimabadi
Ab tujh se phiraa ye dil-e-naakaam hamaaraa
Us kooche men kam hee rahegaa kaam hamaaraa
Hai sakht mire darpa-e-jaan teraa gham-e-hijr
Jaanaan se kahe jaa koi paighaam hamaaraa
Jaageer men hai ghair kee wo bosa-e-lab go
Qaa.em rahe ye mansab-e-dushnaam hamaaraa
Hone nahin paate ye mire deeda-e-tar khushk
Daulat se tiree tar hai sadaa jaam hamaaraa
Do din men kisee kaam kaa rehne kaa nahin too
Kuch tujh se nikal le kabhi to kaam hamaaraa
Ik roz milaa aalam-e-mastee men jo ham se
Tanhaa but-e-badmast mai-aashaam hamaaraa
Shamsheer alam kar ke lagaa kahne rakhoon Thor
Badnaam too kartaa phire hai naam hamaaraa
Ayyaam ke har zikr se aur fikr se faarigh
Yaa ishq hai vird-e-sahar-o-shaam hamaaraa
Hota na farebanda-e-dil kaash ke 'hasrat'
Aaghaaz men ye ishq-e-bad-anjaam hamaaraa