har taraf hai us se mere dil ke lag jaane men dhuum
— Hasrat Azimabadi
Har taraf hai us se mere dil ke lag jaane men dhuum
Bulbul-o-gul men hai chah-chah sham-o-parvaane men dhuum
Fitna-gar hai naaz-o-ishva us kee chashm-e-shokh men
Juun machaaven pee ke mai badmast mai-khaane men dhuum
Yaad men apnee hai shaayad wo faraamush-kaar bhee
Dil kare hai mujh se us kee yaad dilvaane men dhuum
Jis tarah baad-e-khizaan-deeda men aatee hai bahaar
Shahr men hotee hai us ke mere ghar aane men dhuum
Naubat auron kee to ai saaqee suboo-pardaaz hai
Kya machaa.ee hai hamaare ek paimaane men dhuum
Juun bulandee se gire hai khaak par koi za.iif
Hai miree us shokh kee nazron se gir jaane men dhuum
Dekh to le ser ho kar tujh ko ye khaana-kharaab
Aate hee kya hai tiree itnee bhee ghar jaane men dhuum
Barhaman hone ko aataa hai nayaa shaikh aaj kaun
Ho rahi hai har taraf 'hasrat' sanam-khaane men dhuum