kab talak ham ko na aavegaa nazar dekhen to
— Hasrat Azimabadi
Kab talak ham ko na aavegaa nazar dekhen to
Kaise tarsaataa hai ye deeda-e-tar dekhen to
Ishq men us ke ki guzre hain sar o jaan se ham
Apnee kis taur se hotee hai guzar dekhen to
Kar ke wo jaur-o-sitam hans ke lagaa ye kahne
Aah o afghaan kaa tiree ham bhee asar dekhen to
Sabr ho saktaa hai kab ham se vale maslahatan
Aazmaa.ish dil-e-betaab kee kar dekhen to
Dhab chaDhe ho mire tum aaj hee to muddat baad
Jaa.enge aap kahaan aur kidhar dekhen to
Kis dileree se kare hai too fidaa jaan us par
Dil-e-jaan-baaz tiraa ham bhee hunar dekhen to
Kya majaal apnee jo Kuch kah saken ham tujh se aur
Tujh ko bhar kar nazar ai shokh pisar dekhen to
Ho chaleen kheera to akhtar-shumaree se aankhen
Shab hamaaree bhee kabhi hogee sahar dekhen to
Ishq ke sadme uThaane nahin aasaan 'hasrat'
Kar sake koi hamaaraa saa jigar dekhen to