kya kahuun tujh se mirii jaan main shab kaa ahvaal

Kya kahoon tujh se miree jaan main shab kaa ahvaal Tujh pe raushan hai dil-e-vasl-talab kaa ahvaal Hoon main ik aashiq-e-be-baak o kharaabaatee o rind Mujh se mat poochh mire ilm-o-adab kaa ahvaal Dil ko khaalee karoon ro ro ke magar main be-kas Kaun suntaa hai mire ranj-o-ta.ab kaa ahvaal Mahram-e-raaz nahin miltaa koi dard hai ye Kya tabeebon se kahoon ishq ke tab kaa ahvaal Lutf hai sab se sazaavaar-e-ghazab ek hoon main Khuub dekhaa jo tire lutf o ghazab kaa ahvaal Ai miyaan aaj to do baat miree bhee sun le Kahaa chaahoon hoon main tujh se bhalaa kab kaa ahvaal Zor hai jaise ki nisbat namak o riish ke biich Main hee samjhoon tiree kaifiyyat-e-lab kaa ahvaal Nahin dam maarne kee mujh ko tire aage majaal Haa.e suntaa hai too kis tarah se sab kaa ahvaal Kya koi khush ho mire sher ko sun ke 'hasrat' Dard-e-dil hai ye nahin aish-o-tarab kaa ahvaal