meri us pyaarii jhab se aankh lagii
— Hasrat Azimabadi
Meree us pyaaree jhab se aankh lagee
Us saraapaa ajab se aankh lagee
Ishq men khvaab kaa khayaal kise
Na lagee aankh jab se aankh lagee
Khvaab men bhee na dekhaa ham ne lutf
Kis saraapaa ghazab se aankh lagee
Jitne khush-chashm hain zamaane men
Rahtee hai meree sab se aankh lagee
Raat hamsaayon kee na sub.h talak
Meree afghaan-e-shab se aankh lagee
Yaar aataa nazar nahin aataa
Hai idhar meree kab se aankh lagee
Rahtee hai us nigaah-e-kaafir kee
Ranjish-e-be-sabab se aankh lagee
Mujh ko mat dekh hai balaa 'hasrat'
Yaar-e-aashiq-e-talab se aankh lagee